30 de octubre de 2013
30.10.2013

Colocamos el calabazón

Les calaveres de la Nueche d'Ánimes, el Halloween asturianu

30.10.2013 | 01:56

La fiesta de Halloween, que ta entamando a celebrase en dalgunes escueles de la mano de los docentes d'Inglés, ye una d'eses tradiciones que se diz de "dir y volver". L'orixen ta na celebración celta del Samhain, que trescurría nel tiempu que va de la nueche del 31 d'ochobre al 1 de payares y que'l cristianismu tresformó nos tradicionales Difuntos y Tolos Santos. Como les más de les celebraciones d'orixen celta tenía una fuerte rellación cola naturaleza, pues l'últimu día d'ochobre yera tamién l'últimu pa coyer los frutos de les colleches, y polo tanto'l momentu nel que s'entraba nunos meses nos que los árboles y les plantes quedaben ermos. Asina la palabra Samhain significa en gaélicu, llingua oficial n'Irlanda, "fin del branu".

N'Asturies, como n'otros llugares de la Península, esta tradición taba mui viva hasta hai menos de trenta años. Lo tradicional yera escoyer les calabaces más grandes de la güerta y afuracales con formes de calavera. Cuanto más grande fuere la calabaza, o'l nabu en dalgunos pueblos, más lluz diba salir pelos furacos y polo tanto más diba asustar a la xente.

Solíen ser los mozos y les moces les que s'encargaben de vaciar la calabaza, yá que yera un procesu llargu y abegosu. Lo primero que facíen yera colocar la calabaza col rau p'arriba, dempués abrir per ehí pa dir sacándo-y la carne. Una vuelta vaciada diben abriendo los güeyos y la boca con tallaes bien precises y, acabáu esti procesu, decorábenla con otros elementos como les pebites de la calabaza pa los dientes, o'l pelo de la panoya pa la barba. La calavera nun taba acabada por embargu hasta que nun se volvía a llevantar el rau pa meter la vela y, una vuelta prendida, acababa colocada nes puertes y les ventanes de les cases o nos llugares más escuros de los caminos.

La costume de mazcaritase tampoco paez un inventu nuevu n'Asturies. La tradición d'afuracar el calabazón yera acompañada en munchos sitios pol procesu de poner enriba un pañu blancu, talamente como les ánimes del purgatoriu o güestia, p'asustar a los probes que teníen la mala suerte de pasar peles caleyes, los molinos o les viesques na nueche del 31 al 1.

Esto ye que Halloween, que paez ser una derivación de la espresión inglesa All Hallows' Eve (viéspora de Tolos Santos), taba equí munchu tiempu enantes de que los emigrantes ingleses ya irlandeses la llevaren p'América y d'ellí volviera en forma de películes y llambiotaes. Tanto ye asina que seguramente n'Asturies tán conviviendo na mesma casa nietos que van pidir "Truco o trato" con güelos y güeles que saben mui bien cómo afuracar un calabazón. Dende equí animámosvos a pregunta-yos, al tiempu animamos a los docentes de Llingua Asturiana a trabayar esta tradición nes aules, cuntando tanto la "ida" o la tradición n'Asturies como la "vuelta" y el so pesu na cultura anglosaxona; guapamente dientro del contestu del proyectu llingüísticu de centru.

Compartir en Twitter
Compartir en Facebook
Patrocinado por nombre

Lotería de Navidad 2014