La segunda edición del premiu "Fierro Botas" a la meyor idea normalizadora del Conceyu de Xixón recayó nel alumnáu de 1u d'ESO del IES Doña Ximena. Los escolinos recoyenon el premiu'l pasáu vienres 9 de payares nun actu cola Conceyala d'Educación y Cultura, Monserrat López Moro, y la responsable de la Oficina de Normalización Llingüística, María Xosé Rodríguez López.
L'enfotu de les alumnes y alumnos del Doña Ximena, pente medies de la so iniciativa "Fartúcate en Xixón", por normalizar l'usu de l'asturianu na hostelería de la ciudá fíxolos merecedores d'esti galardón, que tien como premiu una pizarra dixital pal aula de llingua asturiana, "amás de la posibilidá de la realización del proyectu per parte de la Oficina de Normalización Llingüística de Xixón".
El premiu "Fierro Botas" fai por, per un llau, homenaxar al sacerdote y eruditu xesuita Federico González-Fierro Botas, que tanto fixo pola cultura asturiana y pola so apertura a Europa, y per otru llau alendar la reflexón del alumnáu de primaria y secundaria sobre la normalización del asturianu, y la so implicación nel procesu.
