Nun fai falta demostrar l'enorme valir que tienen los xuegos na formación de la reciella: non namás porque al traviés d'ellos los críos alquieran vezos (y zunes) a la hora de comportase colos otros, sinón porque los xuegos en sigo mesmos son actividaes que van poder siguir realizando demientres tola so vida, y que van trae-yos gayola, repertoriu motor, y hasta un conocimientu más fondu de la realidá seique. Asina lo podemos ver pente medies d'iniciatives como'l congresu internacional "Los xuegos tradicionales güei", que tuvo llugar la fin de selmana en Cangas del Narcea.
Non ye d'estrañar, entós, que nel momentu que tamos viviendo, d'igua del procesu de tremisión del asturianu a los más pequeños -y que protagonicen asociaciones como Reciella: families pol asturianu-, apaezan propuestes tan necesaries como la d'Acuto Xuegos.
Esta iniciativa ye, según rellata a "Escolinos" ún de los sos fundadores, Félix Fernández, "daqué familiar". Y ye familiar por dos motivos: pa empecipiar, porque la otra persona que trabaya xunta Félix n'Acuto Xuegos ye Mamén Álvarez, la so muyer; y pa siguir, porque too entamó por deprender de les dos fíes que tienen: a qué queríen xugar y cómo queríen xugar, en rellación col aspectu llingüísticu.
Félix Fernández ye conocíu pola so participación dende hai años en delles asociaciones y entidaes asturianistes de la redolada d'Avilés, y d'ehí vien el doble calter que tien Acuto Xuegos: facilitar que la reciella tenga accesu a productos lúdicos en llingua asturiana. La idea, según cunta Félix, xurdió de "la necesidá de cubrir esti espaciu", y ver qué funcionamientu puede tener nel mercáu.
Poro, Acuto Xuegos ta acabante de llanzar el so primer productu, El xuegu de les pareyes: "Ye'l tradicional xuegu cartes de memoria, metiendo de conteníu oxetos o coses coles que los neños interactuen davezu nel so día a día. Tratase d'una carta col debuxu y el nome debaxo, trabayando asi'l nome asturianu. Son 18 cartes en 9 pareyes: llapiceru, llibru, l'arcu la vieya, güeyos, trebeyos, xeláu, fueya, lluna y tisoria".
La iniciativa yá ta espardiéndose per toles redes sociales (Facebook, Instagram y Twitter) y tienen mui claro qu'el xuegu ye ún de los pegoyos fundamentales nel desarrollu de la vida de los neños y les neñes. Poro, va sacar nes próximes selmanes un xuegu nuevu, un puzzle, y too ello col envís de da-y normalidá a que'l neñu o la neña xuegue n'asturianu y col asturianu, siendo esta una de les principales razones de ser d'Acuto Xuegos.
Los xuguetes y xuegos van poder mercase mesmo n'Internet qu'en dellos mercaos de tol país, asina como en dalgunos puntos de venta físicos n'Avilés, Xixón y Uviéu, que van anunciase llueu.
