La reciella más piquiñino, los neños y neñes de menos de trés años tamién deprenden asturianu na clas. El serviciu de normalización llingüística d’Avilés encargó hai dellos años una serie d’elementos educativos pa esos rapacinos y la firma de diseñu Signum foi la que ideó los rompecabeces primero d’animales de la casería y xabaces y tamién del cuerpu humanu. El caberu entamó con un puzle de la cara, y depués con otro del troncu. "Yá tamos montando el diseñu de les piernes", diz Monchi Pedreira, responsable de la empresa Signum. Y esos rompecabeces llámense "Xugamos pa deprender".
Esos rompecabeces viaxarán nes prósimes selmanes a los conceyos de Avilés, Siero, Ll.ena, Cangas del Narcea, Comarca de la Sidra y Grau que depués entregarán a les distintes escuelines de los sos conceyos. Montse Machicado ye la responsable de la Estaya de la Llingua d’Avilés. "Nun había nada pensáu pa les escuelines y decidimos entós organizalo tou", desplica. La so homóloga de Ll.ena, Penélope Miranda, plantega que "ye perimportante que los rapacinos que lleven l’asturianu de casa nun vayan p’atrás y sigan calteniendo l’idioma". Amás, diz Miranda, que los "Xugamos pa deprender" respeten les variantes del asturianu como la de Ll.ena y la so metafonía con palabres como "xetu", "pirru" y "guetu" nos rompecabeces de los animales. En Cangas, usénse xiros del asturianu occidental y en dambos l’usu de la "ll" sopuntiada.
Rebeca Gutiérrez ye una de les educadores de la escuelina "El Nial" de La Pola Ll.ena. Desplica que los xuegos y rompecabeces usénse sobre too nel día de les Lletres asturianes y el la Llingua materna "y otros díes, ye un elementu más de trabayu, ye más cuando damos los animales, por exemplu, dicimos-yos los nomes n’asturianu como abeya, coríu y tamién en castellán".
Raquel García ye la directora de les escuelines de La Toba y La Madalena, n’Avilés. Agradez esos recursos educativos y defiende, como Gutiérrez, que los puzles de "Xugamos pa deprender" "son un recursu más" nes aules de los centros municipales avilesinos. Y con eses, l’asturianu tamién ta presente nes aules de los piquiñinos, esos rapacinos que munchos entá nun saben falar pero van deprendiendo delles palabres n’asturianu como los nomes de los animales de casa y xabaces y tamién les partes del cuerpu como los papos, los güeyos y el pescuezu, ente otros.
