Pese a que'l depósitu llegal correspuende a 2018, Formientu vuelve esti añu como una bona noticia pa les lletres asturianes y la meyor seña de qu'aínda hai un ensame bulliciegu d'escritores mozos con ganes d'enanchar les llendes de la lliteratura n'asturianu. Lo más difícil d'editar una revista lliteraria seique sía sacar el primer númberu. Lo segundo más difícil ye caltener la edición. Formientu, revista de lliteratura mui moza, acaba algamar el númberu 17 y convién emponderalo, arriendes d'ello teniendo en cuenta la poca ufierta qu'hai en revistes lliteraries n'asturianu y l'aguante ruín que suel amosar por una razón o otra les que nacen. Formientu nació en 2006 y trece años depués sigue aguantando'l tirón pa facer llegar la voz de la lliteratura más nueva al llector inquietu. Nun hai dulda de que la revista sirve y sirvió de cantera a bona parte de la fornada última d'escritores en llingua asturiana (a lo menos pa los qu'entamaron a escribir nos quince últimos años). Agora cambia de dirección con Claudia Elena Menéndez Fernández y Diego Solís, y ello traduzse en dalgunes modificaciones de perspectiva ensin que la esencia de la revista sía otra. Poro, como bien ha ser, el cambiu de dirección sirve pa da-y una nuevu impulsu a esti proyectu tan guapu.
El nuevu númberu nun defrauda y podemos atopar poesía de Javier Cayado Valdés (con un poema posmodernu onde se mecen Kropotkin y Vargas Llosa), Miguel Luis Álvarez (en clave beatnik, y ensin que suene peyorativu l'apellativu) y Olái Leal Vázquez. A continuación apaez un interludiu críticu a cargu de Diego Solís, que fai una amplia reseña de Nes ruines de la nueche y les hores, d' Inaciu Galán, poemariu que ganó'l Fernán Coronas en 2016. Paga la pena parar equí porque la reseña de Solís ye de lo meyor de la revista: una crítica ponderada onde amerita lo que-y paez y nun furta la ocasión de señalar los fallos que'l críticu xuzga de manera equilibrada y constructiva, ensin ofender nin facer sangre, con ánimu d'apurrir preseos d'orientación tanto al llector como al propiu escritor. Fai falta muncha más crítica d'esta triba si queremos que la lliteratura asturiana espoxigue. De fechu, echo en falta más crítica lliteraria nesti númberu de Formientu. Quedóme una sensación de necesidá y vacíu. Una sola reseña lliteraria en tola revista.
Y asina pasamos a la narrativa de Borja Riestra Camacho (un cuentu breve y sentimental) y Alba Carballo (una hestoria d'amor intercultural), un paréntesis poéticu de Irma González-Quevedo Pedrayes (sobre'l silenciu énte les sombres que nos atormenten caldía), y vuelta a la narrativa de Naomí Suárez (un cuentu sobre l'ausencia tresformada en congoxa y que quiciás nun pudo evitar un final O'Henry cuando valía más facelo), Federico Faccio (duru y magníficu rellatu, intensu, y valiosu, como primera piedra de toque y necesidá de que l'autor siga enseñando testos: mui prometedor), Natalia González Menéndez (otru rellatu intercultural, y siendo'l segundu hai que tar sollertes por si marca una tendencia d'interés na nueva lliteratura asturiana), Samuel Fernández Cuervo (rellatu metalliterariu) y María F. Abril (con un cuentu mineru sobre la falta conocencia del destín y, en xeneral, de cualesquier cosa).
Andrés Astur Treceño García apurre una entrevista a Fran Gayo, director dende 2016 del Festival de Cine Internacional d'Ourense (OUFF). Pela otra cueta, Javier Cubero toca'l xéneru del ensayu, xéneru tan apetitosu como poco tratáu na lliteratura asturiana. Nesta ocasión, escribe un ensayu sobre la construcción identitaria al traviés de la peñera de Conceyu Bable y el so papel de revision histórica d'Asturies mientres la Transición. Imprescindible testu. Darréu, Francisco Priegue dedica otra estaya a la crítica (musical nesti casu, sobre la cantante Björk), pa terminar la revista con tres capítulos de torna per parte de Víctor Ruiz Aldana (un cuentu de J. R. R. Tolkien), Antonio Francés (testos de Tito Livio y Ovidio) y Cristian David López (un poema guaraní). Completen la revista les semeyes perinteresantes de Lluis Fanjul, qu'igual sirven pa separtar estayes que como obres d'arte en sí mesmes y con propiu valir. Cuerren nuevos tiempos pa Formientu.
