A tol mundu-y gusten los caballos. Nun los podemos meter nel pisu onde vivimos y gracies a eso los perros respiren tranquilos. L'interés que despierta'l polémicu cierre municipal del centru ecuestre El Asturcón nun s'esplica ensin esta equinofilia universal. Quiero decir que, si'l tema fuere clausurar un criaderu de pitones (culiebres, non gallines gordes), l'alcalde podía repartir escopetes y convocar un concursu de tiru al reptil ensin mayor escándalu ciudadanu. Les razones d'esti apreciu nun son un misteriu: el caballu retrata l'ésitu social. La casa d'Alba tien xinete na familia y la casa d'Inditex integrólu por capitulaciones matrimoniales: coinciden la nobleza de sangre y la capitalista nel cultu a la ferradura (la bota de fútbol déxenla pa la plebe). Y mire usté qué productos y qué marques se representen con caballos: Ralph Lauren, Burberry, Ferrari, Porsche? La potencia de los coches mídese en caballos y tien equivalencia n'euros.
Pero los propietarios de caballos nun gocen de la mesma simpatía fuera del íntimu círculu hípicu (falamos del mediu urbanu, claro: nel mediu rural, cuesta diferenciar el caballu de la familia pa bien y pa mal). ¿Será la envidia? Nun-y lo niego: namás constato, con rigor científicu, que, nesti casu, nun se produz metonimia sentimental. Ignorante d'ello al empar qu'encesu, un usuariu de les cuadres d'El Asturcón puñaba contra'l gobiernu municipal d'Ovieo va unos díes na radio, dándolu por electoralmente difuntu a cuenta de la engarrada. Nun sé. Les persones tiramos a miopes cuando entramos a considerar lo que nos toca de cerca. Siempre hubo más infantería que caballeros y, dende la constitución de 1931 (quitando esi llargu paréntesis que nun fai falta citar), los d'a pie tán teóricamente en condiciones de subise a la chepa anque nun-yos dea pa subise a la grupa. En Vetusta, paez que la teoría conviértese en práctica esta lexislatura. L'usuariu al que me referí arriba, y los demás que con él protestaben, vense en posesión de doce tantos del tute, los burros de los cuatro palos, y tomen al tripartitu municipal por sotes, pero enquivóquense: nesta partida, son reis y tán en condiciones de llevar la baza y cantar les cuarenta. Pinten bastos.
A esti triste enfrentamiento de clase social y deportiva, a esti descabalgamientu, llegóse (hai que lo decir) por falta de previsión de los xestores d'El Asturcón y de los usuarios con cuadra arrendada (box, si queremos ser más técnicos). Nun se practicó una política preventiva de boxes sociales (según pasa cola vivienda destinada a humanos) que, si nun momentu determináu podía abultar innecesaria y hasta indeseable, agora échase en falta como pararrayos. ¿Podemos imaxinar al tripartitu desahuciando un centru ecuestre onde una cuarta o quinta parte de los caballos fueren d'etnia caló? Si, nel momentu conveniente, Gabino de Lorenzo dona un potru de la so yeguada d'Onís a cada escuela pública carbayona (la forgaxa: animales de poca calidá, los que salieren ruinos o torgaos, que ya se sabe que los maestros eduquen a los neños na sensiblería solidaria) y los apadrina El Asturcón con derechu a visita escolar según calendariu, ¿diben los ediles de Somos oponese, agora, a la menor protesta infantil contra la espulsión de Furia, Rubí o Nieve?
A veces, hai qu'asumir molesties pequeñuques (una fogata con palmes en directu al pie del picaderu, unos rapacinos en mandilón d'Alcampo estucando al mocu los cuarterones de los boxes) a cambiu de la paz social. El gatopardismu que ye la base catecumenal de cualquier políticu posibilista: cambiar algo pa que nun cambie nada.
