A pesar de la so mocedá, Sergio Gutiérrez Camblor (Siero, 1985) nun ye un recién llegáu a la lliteratura asturiana. En 1999, con catorce años, yá ganara'l «IV Certame de Poesía Constantino Cabal», y debió ser entós cuando Berta Piñán nos faló d'aquel brillante alumnu del Institutu de La Pola Siero. Ente'l 2005 y el 2006 mantuvimos un intercambiu de correos electrónicos que terminaron concretándose na publicación del so primer llibru, A dixo a B: «perversu» (2007), un llibru con clara voluntá de ruptura y que Camblor modificaba constante y significativamente na corrección de pruebes, hasta que dende la editorial-y diximos que taba yá imprimiéndose.

Arropáu agora col «Premiu Asturias Joven» llega'l so segundu llibru, Los dioses de Curtis, nel que yá s'oi la so voz propia. Hai que destacar, en primer llugar, la extensión d'esta obra, cuarenta y cuatro poemes, porque parez que se va instalando ente otros autores la idea d'ofrecer como llibru una docena de poemes. Pa la poesía nun ye nin bono nin malo la cantidá, pero pal bolsu del comprador yá ye otra historia. Los poemes de Gutiérrez Camblor van dando cuenta, de manera desenfadada y reflexiva, del procesu vital d'una persona d'esti tiempu, que vive distintes realidaes a la vez: la cotidiana, la dixital que lu conecta nel intre con cualquier parte del mundu, la de los medios de comunicación que train estímulos mui estremaos? Ensin renunciar del too al irracionalismu, los sos poemes nun pierden de vista la realidá del mundu, y eso axuda al autor a salir bien paráu de los riesgos qu'asume cola so propuesta poética tresgresora.

Más qu'un autor posmodernu, Camblor ye singular. Sintetiza bien la modernidá (les referencies audiovisulaes, los paisaxes urbanos, les marques comerciales?), pero ensin dexar de ser consciente del oficiu d'escribir, de que trabaya con palabres pa comunicar arte. Tien claro, por exemplu, el valor de los clásicos dientro de la lliteratura (pelos sos versos pasen Virxilio, Catulo, Kant?), pero alcontramos na so obra otres referencies culturalistes menos habituales: la feminista Laura Mulvey, el cantante Morrisey, Alfred J. Kuak (un dibuxu animáu), Iggy Pop? o el Breviariu Llatinu. Camblor consigue que tan distintos elementos concasen a la perfección nesti llibru, que l'autor confiesa escritu baxo l'influxu musical de Ian Curtis y de Joy Division. Quiciabis venga d'ehí la desolación pela que caminen estos poemes, nos que siempre hai dalgo escuro, amenazante, tenso. Nos qu'hai, sobre too, oficiu, orixinalidá y alta poesía.