Auxa y Balvidares, dos poetes de la Ilustración asturiana

Ente Xovellanos, Posada y Auxa mediaríen fuertes llazos d'amistá (familiares tamién nestos últimos) que duraren hasta los sos postreros dis, con alcuentros ente ellos en puntos tan estremaos como Madrid, Asturies o Mallorca, inclusive banciando (nesti últimu llugar) per ente les abegoses circunstancies del destierru. En rellación con estos tres, munches vegaes aconceyaos en Carrió, en Candás o en Lluanco, afayámonos cola figura de Xuan Gonzalez Villar, autor de La Xudit, emponderáu por Carlos González de Posada que lu consideraba «tal vez el mayor literato que tenemos». Toos ellos xunen, a la so afición pol bable, otros intereses como la historia y los documentos medievales, la lliteratura y la mitoloxía grecollatines, que queden bien patentes nes sos poesíes, de calter munchu más elitista, tantu dende lo formal (cola so preferencia pola octava real) como dende lo temáticu (pola abondancia de referencies cultes).

L'amistá y el tratu venceyen tamién a les otres dos figures destacaes del grupu, Antón Balvidares y Xosefa Xovellanos, que xunta Gaspar atopamos, nuna ocasión (asina se señala nos Diarios) aconceyaos pa xintar n'Uviéu, onde tamién vivía Rodrigo Antonio González de Cienfuegos y Velarde (1745-1813), VI Conde de Marcel de Peñalba, fíyastru de Benita Antonia, hermana de Xovellanos, al cual Auxa dedicara dellos poemes, y que recibía na so casa de la cai «Encimavilla» al so entrañable amigu Balvidares. Al empar de la so rellación personal, son munchos los puntos en común ente Xosefa Xovellanos y Antón Balvidares, poetes que, frente al culturalismu de los anteriores, creen un lirismu más popular (col emplegu casi xeneral del metru romance), al empar que denuncien los abusos del poder y la inxusticia social, pente medies d'un humorismu más ácedu y d'un humanismu más vital y personal, que proporcionan a los sos versos una enorme capacidá de tornase reales. Sicasí, tán tamién presentes nestos dos autores dellos elementos cultos como l'emplegu de tercetos encadenaos (por Xosefa) o la bayura de referencies llibresques y hestóriques nel Diálogu de dos casinos de Balvidares.

La nómina d'autores d'esta xeneración del mediu sieglu complétase con dos poetes plenamente partícipes d'un lirismu popular: Francisco de Condres y Bruno Fernández Cepeda. De Condres, presbíteru de Candás, poco se sabe más allá de la so amistá con Auxa y con Xovellanos. Quicibes seya elli l'autor del inéditu romance sobre lo ocurrido a cuatro sujetos en el lugar de Jove, con motivo de haber ido a recoger manzanas (que comencipia «Agora que estoy folgáu...»), onde apaecen profesores y alumnos del Institutu. Por últimu, la pertenencia al grupu de Bruno Fernández Cepeda (poeta con bastante obra conocida) sofítase más en razones cronolóxiques que na so rellación col restu. Al villaviociosín atopámoslu averáu a la familia Caveda, pebidal fecundu de les lletres asturianes al traviés de les figures de Rita y Francisco de Paula Caveda y del fíu d'ésti Xosé Caveda y Nava.

Ausente de la colección de poesíes asturianes que Caveda publicara en 1839, el poeta candasín Benito de l'Auxa (1742-1814), de magar de tener más obres (casi toes perdíes) que'l restu de poetes d'esta xeneración, foi escasamente atendíu nos estudios entamaos hasta la fecha. Por embargu, güei ye posible iguar una semeya biográfica d'esti clérigu qu'exerció en Valliniello, en Madrid (nel Hospital Xeneral), en Candás y en Bañugues. Dos años mayor que Xovellanos, Aúxa coincide con ésti na univesidá d'Alcalá, ente 1764 y 1765, y ye per entós cuando-y dedica el so poema n'octaves reales, los Sueños de Nabucodonosor, que comencipia al modu reguerianu con un cuadru ruraliegu y costumista, pa encaxar nesti cuadru la perconocida hestoria bíblica de Nabucodonosor, gran rei babilónicu que destruyó Xerusalén, y del que el Llibru de Daniel cuenta dos sueños que tuvo, que simbolicen l'esporpolle y la decacencia de los imperios. Con precisión y gracia se dibuxa a Nabuco:

Pos, como digo, aquisti rei que pinto

yera de cuerpo y cara ñon mui feo,

sobremanera era soñolinto,

con lles hisopiadures de Morfeo,

era home de bon crer, simplón, sencillo

y capaz una mosca d'atordillo.

Y describe'l primer sueñu y el so significáu:

Ansí-y rellató de qué yera fecha

aquella estauta que lo apaullara

y díxo-y después, de cruz a fecha,

cuanto por ella el ciélo-y añunciara,

que par illi yera aquella andecha

que lla cabeza d'óro-y tocara,

porque a los que detrás fosen viniendo

se-yos había ir el reino desmuciendo.

Y con gran fuerza espresiva cuenta el fin terrible que-y espera al poderosu rei:

Múdense sos corades y botiello

en entrañes de fiera, vueltes dando

un setenario de años y, al cumplillo,

sepia que d'isti mundo todo el mando

ñon ye otra cosa más que un argadiillo

aú, el que se mira devanando,

cuando lles coses cuida gobernades,

afaya mil marañes enredades.

Xunta esta obra, la fábula de Píramo y Tisbe yera bien conocida, de magar que, hasta va pocu, se creyía escrita por Marirreguera. Por embargu, el so tonu moralizante y el gustu pola digresión mitolóxica (al empar d'otros aspectos) son rasgos inequívocos del cura gozoniegu,

Dende una visión menos llibresca y más mundana, igua sos poesíes Antón Balvidares (1751-1792), que viviera ente el so Sariegu natal y, a partir del so matrinoniu, en Ceceda, onde recibe a Xovellanos de pasu nún de los sos viaxes. Poeta precoz, que con pocu más de venti años componía un Diálogu de dos casinos, llargu romance embutíu hasta fartar de referencies hestóriques y xeográfiques. Sicasí, nes obres posteriores Balvidares algama una mayor calidá espresiva, frutu de la naturalidá, l'habilidá en pintar situaciones y, sobre too, d'un inxeniu y comicidá migaya vulgares. Nes obres que se conocín hasta la presente edición, Balvidares amosaba un tonu de fonda indignación escontra los estamentos dirixentes, especialmente el cleru, al traviés de la descripción del entierru de Regueru, que llegó a ser callórigu «sin ver lletra», y tamién escontra la xusticia, como pue vese na Visita a ll'Audiencia:

Entréme desgorretadu

temblando como una fueya.

Pos al ver los señorones

sentados en uña escañera,

sesudos como colchones,

lla cabeza fariñenta

que parecín seis defuntos

escuchando con graveza...

¡Por ñuestra vida, compadre,

la barba se ponxo crespa!

Esti mesmu enfotu de denuncia y quexa, apaez n'otru de los sos poemes conocíos, la Canción al Santísimu Sacramentu:

¿Qué-y paez d'esti mundu?,

¿no está bonu?, d'él reñego,

pos al que quier da-y gustu

-y dan dentada de perru [...]

Porque algún pocu de pan

y algún maicín que cueyo,

apenes lo meto n'horru,

sal la mio muyer diciendo:

-¿Pagaste ya el diezmu al cura?

-Vamos lluego pa Ubiedo.

-¿A qué diaños hemos dir?

- A pagar la renta al emu.

El poeta Balvidares ufierta otres munches facetes patentes agora colos nuevos testos editaos. A la citada Visita a ll'Audiencia pertenez el siguiente pasaxe, que ye un bon exemplu de poesía erótica (xéneru pocu trabayáu n'asturianu):

Ora falta lo meyor

del talle a la sobaquera

yá me, ¡ah! é fuerza el pintar

lo que va a la delantera

pos un símille llo dice

lo que vi tras de vidriera

¿nunca viste tu, mal hora,

en una mantega fresca

que se acaba de mazar

cuando en gorgoyos se mueve

apegado a la botía

que nin tocallo se prueba

y sin comello ya sabe?

Nesti sen, hai que destacar la novedá del (hasta agora inéditu) Romanzón d'un viaxe a Uviedu, enllenu d'elementos autobiográficos, y nel que sabe reflexar tol inxeniu y comicidá pol que yera reconocíu, asina como la so habilidá en facer imitaciones. La poesía de Balvidares ye un brinde constante a la burlla, al xuegu y al enriedu, propia de quien foi ensin dulda un home allegre y xovial. Nun podemos dexar d'imaxinar a «Balvidares de Ceceda» con un gran sombrerón, a llombu d'una egua guapamente apareyada, venir camín d'Uviéu, aparando en Fonciello, na Barreda, convidáu a entrar nes ventes del camín real, onde yera reconocíu poles sos dotes pa entretener y provocar la risa coles sos imitaciones de personaxes, quiciabes los propios qu'intervenín nos sos diálogos y monólogos, llugares onde demostrar aquello de que:

el mio xeniu é una cabra

sin pastoria. Conque sía

el pastor de la manada,

míu envisu tovía salta.