Los Solís García yeren una familia de Coru (Villaviciosa) que se treslladó, como munchos otros asturianos, a la so tierra d'asilu, que yera daquella Cuba. Casimiro Solís García fue'l primeru n'emigrar, y llueu dirín detrás cuatro hermanos más: José, Bernardo, Ángel y Raimundo. Casimiro asitióse en Guanabacoa, cerque de L'Habana, onde fundó un pequeñu comerciu. Cuando la cosa-y diba bien llamó a los hermanos que, como si tuvieren esperando pela carta, llegaron darréu. Yera l'añu 1888.

José fue'l primeru n'arribar y decide instalase per so cuenta na esquina de les cais San Rafael y Galiano, l'exe comercial más importante de la ciudá. Al principiu yera una sedería modesta, pero que daba importantes réditos; col tiempu convirtiríase nunos grandes almacenes, un edificiu de cinco pisos y setenta emplegaos. En total había, nos años cincuenta, 44 almacenes repartíos ente Cuba, EE UU y España (tamién n'Asturies, n'Uviéu, sigue dando nome a un comerciu).

Tres yeren les grandes innovaciones que realicen los Solís -a José Solís sumóse otru hermanu, Bernardo, que pronto entró na sociedá-, que yera la política de salarios y promoción interna, el conceptu de serviciu al cliente y la búsqueda de la calidá y el gran desarrollu de los eslóganes publicitarios.

Al pocu tiempu, Aquilino Entrialgo tuvo oportunidá d'ingresar nun puestu básicu de la empresa y, col tiempu, formó sociedá colos Solís, así creóse la firma «Solís, Entrialgo y Cía.». Durante años fueron vecinos de les parroquies villaviciosines de Coru, Breceña, Vallés..., munchos llegaron de guah.es, les primeres en madar xente a Cuba con inteción de facer fortuna nos famosos almacenes.

Tamién llegaron d'otres zones d'Asturies, de Grau en concreto, ye'l casu de Pepín Fernández, que dempués de trabayar durante unos años bien duro volvió a España y fundó Galerías Preciados, y posteriormente El Corte Inglés, poniendo de director al so sobrín, Ramón Areces. Esti últimu tamién trabayó nel país antillanu como recuerda un edificiu del paséu del Prado -bastante deterioráu, por cierto, na actualidá- que lleva'l so nome.

El Encanto viose condenáu a sufrir la incautación de los edificios emblemáticos cola revolución. Había llegáose al techu de desarrollu en cuantes a personal y espaciu: en L'Habana yeren cinco plantes y casi 20.000 metros de superficie. Los polémicos acontecimientos sociales y políticos desembocaron nun procesu revolucionariu ensin precedentes.

El 13 de abril de 1961 incautaron les tiendes de la Isla y quedó nel comerciu emblemáticu de L'Habana un retén revolucionariu, con Fe del Valle -antigua trabayadora de la empresa- al frente, que resultó muerta nun ataque supuestamente contrarrevolucionariu. Un voraz incendiu estendióse tan aína, a causa de los materiales que se guardaben nel interior, amburando prácticamente tol edificiu. Acabóse así l'esplendor d'un de los negocios con más futuru en L'Habana, nel so llugar queda'l solar, convirtíu en parque pa que xueguen los neños de güei que serán los mayores de mañana.

Como fechu curiosu, el 21 y 22 d'avientu de 1930 el barcu nel que viaxaba Albert Einstein a San Diego (EE UU), el «Belgenland», fai escala en L'Habana, nesos momentos yera necesario cruzar la canal de Panamá hasta la costa del Pacíficu. El destín del premiu Nobel de Física yera l'Institutu Tecnolóxicu de California, onde perfeccionaría la so famosa Teoría de la Relatividá nel observatoriu Monte Wilson.

Fue una allegría pa los científicos cubanos, aunque la duración de la estancia apenes fue d'unes trenta hores. Los dirixentes de l'Academia de Ciencies Médiques, Físiques y Naturales de L'Habana y de la Sociedá Xeográfica de Cuba trataron de face-y la vida lo meyor posible. A les ocho de la mañana abordaron el barcu pa da-y la bienvenida. Anque yera avientu, Einstein sudaba munchu, y colocaba la mano na frente pa protexese de la intensa claridá del sol caribeñu. Ofrecieron-y un programa completu pa esi día, qu'aceptó con cortesía, pero antes que nada quería dir a dalgún llau onde vendieren un sombreru col que protexese del persistente sol.

Los sos anfitriones escoyeron la más famosa tienda de ropes de la ciudá, El Encanto. José Solís, alvirtíu de la llegada de Einstein, recibiólu a la entrada del so establecimientu y llevólu al departamentu de sombreros. Ellí sacó, ente otros, un sombreru tipu «Panamá», y a Einstein gustó-y muchu porque yera cómodu y xusto a la midida; amás interesóse pol nome del sombreru ya que pensó que yera cubanu. En realidá yera d'Ecuador, nuna rexón llamada Jipijapa onde abunda la palma del mesmu nome, cuyes fueyes tienen una característica mui especial y cuyos aboríxenes herieden el llabor de trenzar y da-y forma y tamañu a cada sobreru requiriendo dos o tres meses pa facelu. Aclaró Solís, que fue utilizáu por los inxenieros en Panamá y por eso-y quedó'l nome. Por supuesto, regaló-y el sombreru nun actu arrogante del maliayés.