A primeros de los ochenta asistí a una discusión reveladora. Con un paisanu como testigu, falante d'asturianu, un profesor d'institutu contrariu al bable enredóse a discutir con un bablista. Como nun papel apareciera la palabra "llibrería", el profesor aseguraba que yera un inventu, que n'Asturies siempre se dixera "librería"; l'estudiante aneciaba con que yera palabra de tola vida. La discusión nun avanzaba, con que los dos acudieron al criteriu d'autoridá del paisanu, buscando la razón. "Yo digo librería, pero la palabra llibrería ye más asturiana". Naquella mesa taben les posiciones que se podíen alcontrar sobre l'asturianu: la de los falantes, cola diglosia y un sentíu arraigáu y xuiciosu de la llingua; la de los antiblabistes, qu'entendíen l'español como la llingua qu'enllenaba los furacos del asturianu hasta la so sustitución definitiva; y la de los bablistes, intentando tornar el procesu con propuestes a veces creatives, acertaes o non como s'encargaben de determinar los homes y muyeres falantes tradicionales.
Al cabu de cásique cuarenta años les discusiones son bien distintes. Nesti tiempu la producción de papel impreso n'asturianu medró y internet demostra ser una ferramienta de comunicación potentísima. La voluntá d'usu d'una parte de la sociedá foi enllenando los furacos léxicos de la llingua, buscando adaptala a les novedaes. Esti llibru, Palabres nueves n'asturianu, estudia la utilización de la llingua en tres medios de comunicación asturianos ente los años 2010 y 2012, observando'l tratamientu que dan los periodistes a eses palabres nueves, los neoloxismos. L'estudiu forma parte d'un conveniu firmáu en 2009 ente l'Observatoriu de Neoloxía de la Universidá Pompeu Fabra de Barcelona, el Seminariu de Filoloxía Asturiana de la Universidá d'Uviéu y el Gobiernu del Principáu d'Asturies. Empieza'l llibru esplicando qué son y cómo funcionen los neoloxismos, distinguiendo la neoloxía popular (la que bautiza como "llendadora" al pastor eléctricu o llama "xalé" a un tipu de casa) de la neoloxía culta, yá seya planificada o primaria. Los autores del llibru avisen sobre lo que llamen "pómpara" neolóxica, el peligru que tien un altu grau d'innovación de quedar zarráu nel asturianismu ensin llegar a la sociedá en xeneral. Quiciabes la propuesta neolóxica que llegó meyor a la sociedá (que nun se recueye nesti llibru) foi el gritu "puxa Asturies" qu'echó a andar Conceyu Bable a mediaos de los setenta, y qu'hasta'l rei Xuan Carlos usó naquellos años.
L'estudiu, mui técnicu, clasifica los neoloxismos (7.477 pal periodu estudiáu) según se formen, con un ampliu vaniellu de posibilidaes; siguen depués los sintácticos, los semánticos, los empréstamos y otros. Munchos de los neoloxismos más usaos son anglicismos: web, rock, páxina web, blog y folk; otros neoloxismos tienen que ver coles esmoliciones sociales: medioambiental, presupuestariu, sostenible, portavoz, reciclaxe, mediáticu... La mayor parte de los empréstamos fórmense por variación, sufixación y prefixación; el castellanu ye la llingua qu'aporta más empréstamos, siguida del inglés y del llatín. Nes llistes de neoloxismos que da'l llibru nun figura yá la palabra sobre la que se discutía naquella sobremesa de los ochenta: ¿quién dulda güei de qu'una "llibrería" asina retulada, tamién ye una realidá presente na sociedá asturiana?
