Javier Fernández nun ye patriota pero sí ye "español por los cuatro costados", según proclamó nel mitin de La Corredoria. Umm... Una declaración nobiliaria... Los hidalgos del XVII, esmolgaos por que nun los tuvieren por moriscos o xudíos, presumíen de cuatro güelos cristianos: d'ehí lo de "los cuatro costados", que conllevaba blasón cuarteláu. Entós, Javier Fernández nun acepta que-y discutan la pureza de sangre española pero caga pa ella. A mi paezme consecuente, absolutamente d'izquierdes.
¿A cuentu de qué fardar d'unos oríxenes nacionales? ¿Val más ser de Mieres que d'Ulán Bator? Pues non. Eso nun te fai más llistu nin más guapu. Ye como'l que presume de tener los cuatro güelos socialistes: ¡a ver qué ventaxes reproductives conlleva esa casualidá! Porque casualidá ye: si naide escueye'l país nel que naz, menos tovía la familia en función de la militancia.
En fin: visto cola distancia conveniente, lo único qu'importa ye pertenecer a la clase vivípara y non a la ovípara, y tampoco ta mui claro que sea como pa presumir d'ello: que-yos lo pregunten a les muyeres.
Vuelvo a lo de nun ser patriota pero sí español "por los cuatro costados". Nun ye de JF: el presidente asturianu citaba a Manuel Azaña, un discursu famosu pronunciáu en Barcelona l'añu 1930. Pero Fernández fai trampa: cápalu, corta'l testu per onde quier. Voi completalu un poco, porque, esi día remotu, Azaña dixo más coses: "Yo concibo, pues, a España con una Cataluña gobernada por las instituciones que quiera darse mediante la manifestación libre de su propia voluntad. Unión libre de iguales con el mismo rango, para así vivir en paz, dentro del mundo hispánico que no es menospreciable. Y he de deciros también que si algún día dominara en Cataluña otra voluntad y resolviera ella remar sola en su navío, sería justo el permitirlo y nuestro deber consistiría en dejaros en paz, con el menor prejuicio posible para unos y otros, y desearos buena suerte, hasta que cicatrizada la herida pudiésemos establecer al menos relaciones de buenos vecinos."
Don Javier, ¿nun-y abulta un poco podemita'l presidente de la República? Pónga-ylo claro, repíta-y usté lo que sentenció na Corredoria: "¡Eso no puede hacerse, al menos en nombre de la izquierda!"
Javier Fernández dixo tamién que "los derechos políticos, civiles, sociales y la libertad solo los reconoce el Estado". O non. España yera un Estáu cuando él nació, en 1948, y esos derechos a los qu'alude nun esistíen. A mi, l'Estáu español sigue ensin reconoceme'l derechu a presentar una novela escrita n'asturiano a un premiu nacional (pero nun-y quiero meter presión al presidente, a ver si va perder el sueñu por culpa mía). D'otra manera, si con esa defensa estatalista quier desacreditar les aspiraciones del rollu secesionismu catalán y la complacencia de los que-y pasen la mano, espetó la chancla en cuchu y al siguiente pasu enmierda'l pie: visto que namás l'Estáu concede los derechos, por exemplu a recaudar impuestos y disponer d'ellos, habrá que llograr ser Estáu (catalán, nesti casu) y dexar pa prau la nación, don Javier...
A ver si pensamos a favor de qué o de quién tamos argumentando...
"Nacimos en el corazón mismo del movimiento obrero", declaró Javier Fernández. Una frase acertada pal contestu partidariu, incondicional, fervorosu nel que se pronunció; una frase integradora, emotiva y señardosa... Tien algo del Palacio Valdés de "La aldea perdida" ("¡Sí, yo también nací y viví en Arcadia!") o de "La novela de un novelista" ("El hombre es un ser que quisiera estar siempre en otra parte. Yo no he aspirado a moverme de la mía."). Eso sí: escrites les dos noveles dende Madrid, como la sentida evocación obrera de Javier Fernández dende la burguesísima parroquia xixonesa de Somió. Boba, bobu: literatura rima con impostura.
Javier Fernández llamó "pitufos" a los militantes d'Izquierda Unida. Gustáben-y más cuando yeren Umpalumpas y trabayaben pa él, maestru chocolateru Willy Wonka.
Javier Fernández acabó'l mitin gritando: "¡No pasarán!" Mala cita, don Javier, porque pasaron.
