El día de Covadonga ("día de la Santina" dende'l puntu de vista cristianu, "día d'eso" dende'l puntu de vista institucional) l'Arzobispu, además de referise a delles cuestiones atinxentes a les sos creencies y a la so feligresía, apuntó a otres referíes a la guerra de Siria y a les sos consecuencies.
Al marxen de les relatives a la emigración, señaló una que nos cinca a toos, yá non como ciudadanos con obligaciones con respectu a los demás, sinón tocantes a la nuestra moralidá en relación col mundu y la forma de velu.
Son estes les sos palabres: "[en dellos países] los fanáticos extremistas están matando, secuestrando y expulsando a cristianos de sus tierras sin que nadie de Occidente llore y lo denuncie". Asina ye, como yá señaláramos equí, en LA NUEVA ESPAÑA, fai tiempu. Pa entender bien eses palabres convién situales nel so contestu: hai n'Europa, y perespecialmente n'España, un exércitu de guardia permanente pa emitir comunicaos, ocupar les calles y ximielgar pancartes, si hai un muertu, por exemplu, en Palestina, una muyer atropellada equí, una intervención armada d'Occidente en daqué sitiu y, en xeneral, pa defender a los qu'incluyen na so tabla de "derechos humanos". Pero si nos países musulmanes s'acantacia hasta la muerte a una adúltera, se cuelga a un homosexual o s'extermina a los cristianos, solo por selo, nun se va llevantar una voz.
Y lo curioso ye qu'eses persones son capaces de sentir entovía empatía polos xudíos o moriscos expulsos fai 400 años; ninguna polos que sufren agora y nun son de la "nómina".
Y ye que'l cerebru humanu (l'arqueocerebru, seguramente) tien un funcionamientu maniquéu, y necesita d'un polu del bien y otru del mal (la Iglesia bien sabe de san Agustín). Y n'Asturies, especialmente, más. Acasu por esi xen "L3flb6", tan arcaicu y tan africanu, qu'heredamos de los nuestros antepasaos y que nos singulariza.
