Abulta centimétrica y kilográmicamente desproporcionao encerrar un paisanu de (vamos poner) metru ochenta d'altura y ochenta kilos pol delitu (si lo ye) cometíu por un títere anorésicu de trenta centímetros y doscientos gramos.
Los que tenemos edá y sexu pa ello, acordámonos de cuando cumplíen arrestu sine die, nos cuarteles, armes involucraes en sucesos luctuosos: un suicidiu nocturnu nuna garita o un disparu fatal durante la llimpieza del fusil. L'exércitu, un puntín animista nesti casu, nun disculpaba la responsabilidá de la máquina cola torpeza o la mala intención de la mano que con ella trataba. Mutatis mutandis, ¿por qué'l xuez de l'Audiencia Nacional manda pal cuartón al titiriteru y, en cambiu, dexa sueltu al fantoche don Cristóbal, auténticu portador del famosu cartel apoloxéticu?
Entre usté en Youtube o Vimeo, escriba "La bruja y don Cristóbal" y va poder comprobar (nun dexe que-y lo espliquemos otros) cómo fue'l pérfidu muñecu ñarigón el que l'otru día, en Madrid, usó'l ya famosu "Gora Alka-Eta" pa comprometer a la bruxa inconsciente. Si ve'l clip, igual coincide comigo en que lo más peligroso de la representación de Madrid yera garrar el tétanos colos fierros de detrás del escenariu y en que los cómicos manipuladores merecen la detención pero por ser zurdos de les dos manes.
Vuelvo a la idea central: que cobren títeres les deudes de los títeres nesti Gran Teatru de Títeres del Mundu postmodernu. La reciprocidá ente falta y pena, pa bien ser, obliga a qu'un indignáu denunciante títere llame a la policía títere pa suspender la representación; la responsabilidá del arrestu recái nun xuez títere y unos medios de comunicación títeres difunden l'escándalu. Contertulios radiotelevisivos títeres piden responsabilidaes de munícipes títeres y políticos títeres de la oposición acusen a una conceyala titeresa d'incapacidá pal cargu. Reacionen los títeres defensores de les llibertaes artístiques, apelen a la Constitución del país de los títeres y don Cristóbal sal de prisión, anque-y retiren el pasaporte de Titerelandia y queda obligáu a presentase regularmente nuna comisaría de títeres. Siendo asina, ta too bien. Pero España y Titerelandia son dos países distintos? digo yo.
