Llevo años señalando nel mio blog l'alegría pol triunfu de los deportistes asturianos nos deportes que dan en llamase minoritarios. Esti últimu mes esos éxitos vienen siendo como l'agua esti veranu: un día sí y otru casi tamién.
Cinco asturianes participaren na selección española que quedó campeona del mundo nos World Roller Games: Sara González, Marta González Piquero, Natasha Lee, Anna Casarramona y María Díez. Delles, además, son xugadores del Hostelcur, un club que, con esi nome y col anterior de Biesca, tien les vitrines atarraquitaes de trofeos.
Los triunfos del tenista Pablo Carreño Busta (¡como pa nun nota-y la nación con esos dos apellíos!) nun son de güei, pero estos últimos díes llegó casi a lo alto l'Urriellu (o, si se quier en ciclista, del Angliru) nel US OPEN y allugóse ente los diez primeros del mundu.
Perihí anda un rapaz de ventidós años, Iván García Cortina destacando na Vuelta a España y tando a puntu de ganar la etapa qu'acababa en Xixón. Promesa bultable, tien además la gracia de facer, n'ocasiones, blincar la bicicleta en medio la carrera pa qu'a los aficionaos-yos preste. Estupendo: calidá, futuru y humor.
Y, por si nun fuese abondo, además de los "caballinos" d'Iván, el caballeru avilesín Gerardo Menéndez gana'l Gran Premiu del Concursu Hípicu Internacional de Xixón, lo que nun facía un español dende 25 años atrás.
Seguramente, a ustedes tanto como a mi. Préstanos.
