Pa empezar, Asturfeito nun construyó ningún telescopiu. Viendo los titulares de prensa d'estos últimos díes, da la impresión de que la empresa radicada na villa del Adelantado ta empezando a face-y sombra a la NASA ("El día que Asturias asaltó el cielo empezó en Avilés", púnxose lírico-patrióticu'l presidente Javier Fernández esta selmana nel actu publicitariu entamáu pola empresa). Un periodista dio noticia de la obra como "el mayor telescopio sinóptico del mundo, un artilugio de observación del espacio que ha sido construido por Asturfeito". Lo de "artilugio" ye un aciertu: el sustantivu va preñáu de la incomprensión del que recurre a él, cosa normal: ¡a ver quién sabe de telescopios, y menos si son sinópticos! Pero, esta vez, l'entusiasmu de la concurrencia y pueser que'l disimulu de los convocantes traicionaron al amigu reporteru: a finales d'abril, un grupu de los responsables del telescopiu, norteamericanos, visitaron Asturfeito pa comprobar que cumplía los estándares que piden na construcción de la montura (¡la montura!) del bichu, que ye monumental, eso sí, porque'l bichu va ser como pa igua-y la miopía al planeta Tierra. Tuvieron cinco díes peles instalaciones d'Asturfeito y, según cuenta con fecha 4 de mayu la web del Large Synoptic Survey Telescope, lsst.org, "the team determined that althoug there are still actions that must be completed by the vendors", anque tovía queden coses por facer ("está totalmente culminado", informaba un diariu asturianu que, por cierto, nun ye esti que tien usté na mano, y digo yo que se limitaría a contar lo que-y dixeron los responsables), anque tovía queden coses por facer, traducíemos, paez que la obra puede tar en plazu, que ye'l mes de noviembre d'esti añu, pa embarcar rumbu a Chile. De manera que nin ta fechu nin ye un telescopiu: ye (va ser) el soporte. A too esto, resulta interesante que los medios se volvieren delicuescentes describiendo los miles de píxeles que va gastar el futuru aparatu, los detalles del universu que va ofrecer o la cantidá de semeyes que va sacar cada nueche, como si esos méritos fotográficos lo fueren de la industria asturiana. Nomenón: lo d'Asturfeito ye mover la cámara, y ta bien, tampoco-y vamos quitar méritu nin importancia visto que nun-y podemos decir al universu: "Un poco más pa la derecha, si me fai el favor."
Nel actu referíu, Belarmino Feito, fundador de la empresa y flamante presidente de la patronal asturiana, aprovechando que'l Nalón nun pasa per Avilés, entrugó y entrugóse pol presupuestu que puede comer la cooficialidá: ya ve usté que'l tema venía a cuentu naquel contestu interestelar. Al otru día, los oficialistes echáronse al monte cuestionándo-y la competencia pa tratar d'un asuntu lingüísticu. Error. El tema nun ye la llingua: son les perres. Sí, ye verdá: tamién podemos pensar que Feito buscaba, con aquelles declaraciones, destacar el contraste ente la vocación internacional de la empresa qu'el fundare (la web d'Asturfeito nin siquiera tien testu n'español: namás n'inglés) y lo que probablemente considera un localismu improductivu (por cultural, ente otres coses): la defensa d'un idioma pa usu internu. Tampoco hai que perder de vista que ye somedán y, en consecuencia, l'estándar asturianu, razonablemente fundamentáu en rasgos morfolóxicos centrales, nun-y debe prestar un plizcu. Pero, repito, Feito nun parlaba de la llingua, sinon estrictamente de perres. A la patronal sóbra-y cualquier gastu del dineru públicu nel que nun vea manera de meter el cazu. Tan poco interés-y merez el bable como'l Muséu de Belles Artes, les cueves prehistóriques, los programes de protección de la fauna autóctona, la enseñanza pública o la programación teatral de La Pola: too son perruques mal usaes porque se-yos escapen. Nun diba ser la primer vez que la FADE protesta contra'l númberu de funcionarios asturianos: cada funcionariu menos ye un capitalín anual susceptible d'engordar el presupuestu del tal o cual obra licitable. Porque, pa qué nos vamos engañar, ser emprendedor de corbata n'Asturies consiste, fundamentalmente, en lleer toles mañanes el BOPA. Pa muestra, un botón: na parte inferior de asturfeito.com, diz: "This web page is a subsidized project whithin the Call for Grants aimed at supporting the international promotion and diversification of the markets of the companies of Principado de Asturias." ¡Ah, hai subvención! ¿Y cuánto nos costó a los asturianos, ho?
miliorodriguezcueto.wordpress.com
