D. M.
Na obra "Diariu d'Enol", de Vicente García Oliva, publicada pola Academia de la Llingua Asturiana nel 1988, cuntábase la historia, en formatu diariu, d'un rapacín -Enol- qu'espierta a la vida colos porgüeyos, problemes y ilusiones propios de la edá, de la clase social media a la que pertenez y de la dómina. Nel diariu, el protagonista va esgranando la rellación que mantién cola moza que más-y presta de la clase, rara y madura, cásique adulta, que nunca-y fixera munchu casu. Agora, ventitantos años depués, nun cucurrabucu lliterariu bien guapu y nuevu na nuestra lliteratura, Vicente García Oliva cuéntanos, en formatu diariu, los porgüeyos, desesperances y problemes d'aquella moza. Asina, l'autor constrúi esta obra como l'antidiariu d'Enol porque los dos tán escritos nos mesmos díes.
Esta novela xuvenil ta editada por Trabe dientro de la colección "Pesllera". García Oliva ye ún de los pioneros en facer una lliteratura destinada al públicu infantil y xuvenil, con títulos destacaos como "Les aventures de Xicu y Ventolín", (1982) o "Fontenebrosa: el reinu de los silentes" (1984), que se convirtió na primer novela xuvenil de la lliteratura asturiana. Les tres ediciones y una segunda parte -"Fontenebrosa II. La rebelión de los homosaurios"- falen bien a les clares del so éxitu.
Per otru llau, la mesma editorial publica tamién "Bernalda la dragona", d'Alicia G. García y con versión asturiana d'Iván Huerga Antuña. El llibru cuenta la historia d'una dragona que cuida una neña cola que va vivir una aventura grande na que van tener que rescatar a la madre de la rapacina.
Esta obra ye interesante pa la reciella d'ente 8 y 11 años y llegó tar editada en Chile pola editorial Edebé, mentes que n'España salió en castellanu cola editorial Desván.
