El Samain, o fiesta del fin del branu, ye una festividá d'orixe celta cellebrada la primer nueche del añu nuevu celta, el primeru de payares. Según la tradición, mentes los tres díes que duraba, los vivos podíen entrar en contactu colos muertos. Esta fiesta conozse pol nome del Halloween nel mundu anglosaxón y les calabaces afuracaes tan famoses pol cine y les series de Hollywood nun son más que los restos de la cultura celta, una tradición que pervivió nos pueblos de tola xeografía céltica europea. Anque nun hai un consensu sobre si ye una tradición inexistente hasta'l momentu nel nuestru país -polo que la so recuperación vendría pola influencia americana y pola corriente ideolóxica celtista-, lo cierto ye que cada vez más escueles y asociaciones celebren el Samaín, intentando amás alloñase de les influencies norteamericanes. Y agora se sumen los Conceyos, como muestren los exemplos de Gozón y Mieres, que pretenden recuperar esta tradición con delles actividaes alrodiu d'esti patrimoniu cultural celta.
Nel casu del conceyu del Cabu Peñes, ente les actividaes que van facer ta'l I Certame de Calabaces "Nueche de Difuntos", qu'entama l'Asociación Xuvenil Peñes. Les persones interesaes en participar van tener que formalizar la matricula enantes del 31 d'ochobre y van poder recibir asesoramientu nuna carpa puesta nel Parque Zapardel, onde tamién va facese un amagüestu na tarde del sábadu y del domingu. Les calabaces van esponese ambientando'l casu históricu de Lluanco y otros llugares del conceyu.
El premiu del concursu va tener tres modalidaes; calabaza natural meyor tallada, la más orixinal y la más grande. Del mesmu mou, el Serviciu de Normalización Llingüística va coordinar colos establecimientos hosteleros de la zona la ellaboración d'un menú con calabaces y anima a les persones interesaes que faciliten recetes tradicionales.
Per otru llau, en Mieres lleven faciendo actividaes na Plaza de Requexu dende'l vienres pasáu. Esti mesmu miércoles van continuar dende les 18 hores cola procesión de la Güestia y les lleendes de mieu, amás de cuentacuentos, taller de caretes y decoración de calabaces. El xueves va haber una mini disco y el vienres va facese una preba de chocolate y galletes, un taller de pintar cares y va entregase'l premiu a les calabaces más apavoriantes. Nel fin de selmana va facese un desfile de perros antroxaos, una gymkhana y va haber música cola interpretación de dellos cantares de chigre y el conciertu del grupu Redset. P'acabar, el domingu ún de payares va ser el tiempu de los xuegos tradicionales. Asina, a les 13 hores, los participantes van poder practicar deportes cola rana, los zancos o cola carrera de panoyes.
