Xixón, Damián BARREIRO
Nel curriculu d'Educación Infantil nun existe l'asturianu y son mui poques les escueles onde s'ufierta la materia nesti ciclu. TPA tampoco nun emite dibuxos animaos nel nuestru idioma. Esta situación pon mui difícil que cuando lleguen a Primaria, onde yá se pue escoyer Llingua y Lliteratura Asturiana como asignatura voluntaria, los neños conserven dalgo de la fala que mamaron en casa. Pa iguar esta situación, l'asociación Reciella-Families pol Asturianu entamó La Escolina, una guardería que tien el nuestru idioma como llingua vehicular. La iniciativa surdió en Xixón y quier que los neños puedan usar l'asturianu fuera del entornu familiar, anque siempre acompañaos por profesoráu especializao. Les clases celébrense toles vienres a les 19 hores nel Colexu Xovellanos y n'elles participen un grupu de seis neños, que van de los dos a los cuatro años.
Namás empezar la clase, los neños coloquen el día de la selmana y el mes nuna cartulina. Dalgún, amás de dicir qué ye vienres y que tamos en payares, recuerda a los demás que yá llegó la seronda. Depués, la maestra, Ana González, cuénta-yos un cuentu cola sida de deprender vocabulariu y tamién escuchen música nel nuestru idioma. "La mayoría de los materiales prepárolos yo, porque pa esta etapa n'asturianu cuasi nun hai nada. La intención ye que puedan deprender xugando", esplica la maestra, que cita ente los principales problemes que los neños tienen mui interiorizao'l castellanu; "Mesmamente, cuésta-yos nun dicir verbos compuestos, anque clase a clase ves como van avanzando y garrando vocabulariu", comenta
Mentes los neños xueguen y deprenden cola llingua, los pas esperen nuna cafetería a la vera la escuela y conversen sobre los problemes qu'atopen pa poder tresmitir l'idioma. "En casa falamos asturianu los tres, pero n'otros círculos ye mui difícil. Por exemplu, los güelos, anque saben, cambien el rexistru col neñu", afirma Miguel Ánxel Montenegro, pá d'Arián, un neñu de cuatro años. Con too, esplica que'l so fíu sabe perfectamente cambiar de llingua según la xente cola que se rellaciona, "anque cada vez ta usando más el castellanu, porque l'entornu obliga a ello. Nesi sentíu, Reciella surdió como un salvavidas pa los que queremos que los nuestros fíos vivan el billingüísmu con normalidá".
Per otru llau, Laura Fernández, ma de Saúl, otru rapacín de cuatro años, comenta que La Escolina nació pa favorecer un entornu onde los más pequeños pudieran socializar con otros n'asturianu; "Ye lo único que podemos facer, porque lo poco qu'existe n'asturianu ye pa neños a partir d'ocho años, que yá tán matriculaos na asignatura", sentencia. Esplica que los neños son "esponxes" y que nun existe nengún problema en que tengan l'asturianu como llingua materna, "porque por deprender esti idioma nun van dexar de conocer otros, cuantos más meyor".
Ente los principales escayos qu'atopen pa crear un entornu favorable al idioma ta la falta d'ufierta televisiva nesti idioma. "A Saúl prestáron-y muncho "Los Bolechas", nós tamién tábemos encantaos. Sicasí, acabaron y yá nun hai nada", sentencia Laura Fernández. Montenegro añade qu'ellos ponen-y al neñu dibuxos n'inglés y n'asturianu, "pero non por que'l castellanu sía malo, ye porque en castellanu yá ta too y hai que reforciar les otres llingües". Del memu mou, Ana González esplica que cuando existió ufierta de dibuxos n'asturianu, esta foi mui curtia y a una hora concreta, "mentes en castellanu ta ClanTV bombardiando 24 hores con Peppa Pig y Bob Esponja".
Pa iguar esto, los pas que tienen el procuru de que los sos fíos tamién falen asturianu tienen claro que la solución pasa pela oficialidá: "Nun tenemos los mesmos derechos que'l restu de ciudadanos, porque l'Alministración ta actuando como si namás hubiese una llingua n'Asturies, el castellanu. Nós tenemos que buscanos la vida, como si nun fueramos una parte de la realidá asturiana", sentencia Miguel Ánxel Montenegro. Amás d'en Xixón, Reciella yá tien abiertos grupos de La Escolina en Carreño y n'Uviéu, que dependiendo de la demanda puen espardese per otros conceyos.
