Entamu. Anque la política cultural pública desarróllase en distintos niveles alministrativos y territoriales, ye nel ámbitu local onde la so función y conteníu tienen un interés especial. La mayor cercanía a los ciudadanos facilita la participación, la interlocución y la presentación de cuentes, lo que requier una mayor y meyor estructuración de la política y xestión culturales. Les acciones locales nesti campu nun puen ser ayenes a los cambios producíos nes últimes décades, onde pasamos de qu'enantes lo que contaba pa establecer la posición d'una ciudá a escala global yera si tenía un palaciu de congresos, un aeropuertu o instalaciones deportives a qu'agora, cada vez más, lo qu'importa ye la calidá de vida qu'ufierta un nucleu poblacional concretu, y nello los aspectos culturales tienen una relevancia bultable. Nesti sen, pue constatase que ta emerxendo una xestión urbana nueva que nun prioriza la construcción d'edificios y infraestructures sinón qu'apuesta poles telecomunicaciones, los servicios medioambientales o l'accesu a la sociedá de la información y la cultura.
Modelu cultural. Avilés como ciudá/conceyu nun tien un modelu cultural claru, como frutu de polítiques errátiques, coyunturales y cortoplacistes, más na actualidá onde disfrutamos d'un potencial artísticu y cultural local importante, que ta tovía ensin esplorar y "esplotar". Nun hai unos criterios definíos, oxetivos y públicos que nos dexen saber los fundamentos polos que se rixen la toma de decisiones, l'asignación de recursos o la estimación o desestimación d'iniciatives, corriéndose'l riesgu de cayer na arbitrariedá decisoria. Nun sabemos qué oxetivos se quieren algamar a curtiu, mediu y llargu plazu. Podemos dicir que la política cultural municipal d'estos años caracterízase pola improvisación, l'oportunismu y la repetición cíclica.
El paradigma del modelu imperante, que tresciende l'ámbitu esclusivamente avilesín, ye'l Centru Niemeyer, presentáu como la gran apuesta cultural de la nuestra ciudá, que diba poner el nome d'Avilés nel mundu y qu'acabó convertíu nun exemplu de xestión desastrosa, mala utilización de fondos públicos y corrupteles varies. La perda del axetivu "internacional" del nome oficial vieno pareya a una programación al debalu, funcionando anguaño más como una Casa de la Cultura bis que como otra cosa. Y ye una pena porque, según l'urbanismu contemporaneu, un centru cultural pue ser un constructor d'estratexes pal desarrollu d'un territoriu específicu; más cuando nos cuesta a tolos avilesinos y avilesines una cantidá curiosa que sal de les nuestres arques municipales (300.000 euros añales).
El modelu cultural que necesitamos requier, ente otres coses, una presupuestación amañosa y planificada, amás d'un mecanismu de control que permita analizar les esviaciones que se puedan producir na xestión, el porqué de les mesmes y les midíes que puen establecese pa evitales. Ye imprescindible ellaborar una evaluación de les necesidaes culturales como puntu de partida pa diseñar un Plan Estratéxicu d'Acción Cultural p'Avilés, impulsar el texíu cultural y artísticu local y comprometese realmente cola escena creativa propia, mayor dinamización de los centros culturales de los barrios, facilitar la utilización de les infraestructures y locales municipales a les asociaciones y colectivos de calter artístico-cultural, apoyar la música en directo y favorecer el llabor a los locales que la promuevan, implementar mecanismos de tresparencia nes decisiones de la política cultural, adoptar el procedimientu de concurrencia competitiva na concesión de subvenciones como l'ordinariu y dexar la concesión directa como un mecanismu estrictamente estraordinariu (eliminando delles que consideramos innecesaries o superflues, como por exemplu la que se concede añalmente a la Fundación Princesa de Asturias -18.000 euros-, una entidá que gocia de bona salú económica y cuentes con superávit), la participación de la ciudá en redes y asociaciones multillaterales dedicaes a la cooperación cultural, asina como establecer una rellación fonda col nuestru entornu xeográfico-cultural natural: el llamáu Arcu Atlánticu, atender a la diversidá cultural presente nel conceyu como instrumentu pa lluchar contra la esclusión social, centralizar tolos servicios y la información venceyada al ámbitu artístico-cultural, aprobar una ordenanza municipal onde se recueya la Carta de Servicios Culturales de la ciudá, adhesión a documentos internacionales de referencia (Declaración de Friburgo o Culture 21, por exemplu)? Como vemos son munches y mui variaes les midíes y acciones que puen entamase pa convertir la política cultural nun motor estratéxicu pal desarrollu integral de la nuestra ciudá.
Participación. Avilés cuenta dende l'añu 2006 con un Reglamentu de Participación Ciudadana, pero ésti nun dexa de ser un conxuntu de bones intenciones, con palabres mui guapes y mui poques concreciones. Nél fálase d'un Conseyu de la Ciudá (inoperante dafechu) o de presupuestos participativos (namás nel nome), ensin qu'apaeza en nengún llau'l calter vinculante de les propuestes y decisiones que pueda tomar la ciudadanía. Nel ámbitu de la cultura esti Reglamentu fala, teóricamente, de la creación d'un Conseyu Sectorial encargáu d'esti tema, que podría "facer consultes, informes, propuestes y suxerencies", pero que na realidá nun se traduz en nada concreto más allá de les palabres, asina les escases esperiencies participatives desendolcaes dende l'Ayuntamientu suelen adolecer d'un enclín paternalista. Nesti sen, nun hai nengún calce que permita una participación real y efectiva del ciudadanu nesta materia y qu'implique de manera integral les fases más relevantes del procesu de reflexón, debate, diseñu, planificación, programación, presupuestación, coxestión, evaluación y control de la política cultural local (o polo menos d'una parte d'ella). Pa nós ye fundamental, precisamente, que la ciudadanía se sienta parte activa na xestión de l'acción cultural del conceyu, por eso queremos proponer la creación d'un Conseyu de la Cultura d'Avilés, como un órganu ampliu y plural de participación que sirva pa debatir, diseñar, controlar y evaluar les llinies estratéxiques a siguir nesta materia. Independientemente d'estes atribuciones o d'otres que se-y podríen asignar, un porcentaxe de los recursos económicos destinaos a cultura sería xestionáu de manera directa y vinculante por esti Conseyu, nel que tendríen representación los actores sociales relevantes nel ámbitu cultural de la ciudá: instituciones, técnicos, representantes políticos, asociaciones, creadores, etc.
Presupuestos. En periodos de crisis como la que carecemos actualmente hai la creencia de que'l gastu en cultura ye susceptible de ser rebaxáu de manera sustancial pero, al marxe d'indicadores estrictamente económicos, ésta ye un bien básicu fundamental asociáu al bienestar de la ciudadanía. Precisamente porque en tiempu de crisis les economíes doméstiques tienden a recortar gastos en dellos bienes culturales, ye necesario y conveniente que la política cultural pública se dirixa a ufiertar más actividá nesti campu a precios reducíos qu'eviten una mengua del dinamismu cultural local.
Los presupuestos municipales han tener en cuenta esta situación y vese reflexaes nellos unes partíes qu'incidan amañosamente na vida cultural y creativa d'Avilés. Los del área de cultura puen ufiertar información mui valiosa sobre la intención que tien o la tendencia que quier desenvolver nesta materia'l gobiernu municipal. A la espera de saber qué va pasar colos presupuestos pal 2016, nel proyectu presentáu pol equipu de gobiernu (colos datos de que disponemos, que nun son toos), a grandes rasgos, ún de los mayores recursos económicos llévalos el pagu del personal adscrito a esti área, existiendo partíes destinaes a subvenciones d'actividaes culturales, a les xornaes del cómic, al certame de curtiumetraxes, a promoción cultural o a normalización del asturianu (ésta cásique simbólica: 12.960 euros, anque esto nun sería lo más importante, sinón la "productividá" que se-y saque y la so rentabilidá social). Pa nós, sería necesario un mayor compromisu col texíu cultural y artísticu local, por exemplu apoyando decididamente a les asociaciones y creadores que desenvuelven la so actividá nel nuestru conceyu y/o dotando meyor económicamente y facilitando infraestructura a los festivales surdíos de la sociedá civil.
Si damos por bones les teoríes qu'afirmen que pa considerar a un municipiu activu culturalmente ésti tien que destinar al menos el 10% del presupuestu total a cultura, Avilés debería preveer, redondiando, sobre 6.400.000 euros pa llegar a esi porcentaxe. La propuesta presupuestaria presentada en materia de cultura ye prácticamente idéntica a la del 2015, con variaciones económiques y temátiques mui pequeñes, destacando la inclusión nesta materia de l'aportación al Centru Niemeyer o a la Fundación Princesa de Asturias, qu'hasta agora teníen la consideración d'"institucionales".
Conclusiones. La xestión cultural nel nuestru conceyu necesita tomar nota de toos estos debates y idees y repensar el so posicionamientu na política global que dende'l consistoriu quier desarrollase. Somos conscientes de que la transición d'un modelu como l'actual a otru diferente ye un procesu llargu y trabayosu, pero ye necesario dotar a la política cultural d'una mayor participación, diversidá, tresparencia y equidá. Y too ello porque nel futuru que queremos p'Avilés la cultura ocupa un sitiu importante.
