Los poetes asturianos nacíos nos ochenta (y ainda dalgunos más nuevos, de los noventa) tomen posiciones. Como si la publicación de l'antoloxía La prueba del once (Poesía asturiana del sieglu XXI) fuera la señal de salida, van apareciendo nestos últimos meses los primeros llibros de dellos autores d'interés diversu: Inaciu Galán, Alejandra Sirvent, María García Díaz (estes dos con obra publicada n'español)... Dalgunos d'estos autores (Moisés Cima, Miguel Ángel Gómez, Solinca Turbón...) aporten col respaldu de los premios más prestamosos d'ente los que se siguen convocando, mientres que los más desixentes (a la traxectoria del "Teodoro Cuesta" o del "Xuan María Acebal" remito) parez que se-yos resisten: el primeru va munchu tiempu que nun lu gana un autor con menos de cuarenta años, mientres que'l segundu consigue baxar por poco hasta los trenta y cinco.
Solinca Turbón Cuesta (La Felguera, 1981) publica agora'l "Premiu Nené Losada Rico" que recibió en 2014. Failo con un llibru de títulu crípticu y nun sé si acertáu, Lliteratura interna, nel qu'ufre trenta y un poemes de mui variada condición, como si nesti volume l'autora xuntara los exercicios de deprendizaxe poéticu, cásique ordenaos por estilos. Asina, los poemes qu'ocupen dalgo más de la primer mitá del llibru reflesionen, dende la memoria, sobre la propia vida y sobre vides ayenes, parándose en dellos de los sos testos sobre la escritura lliteraria; ye'l camín que marca'l poema qu'abre'l llibru, "Pontes", dedicáu al desaparecíu poeta de Llangréu Alberto Vega: "A vegaes tu namái / pintes señales nel cielu. / L'aniciu, la inspiración, / la gueta de los trasgos, / la eternidá, / l'alcordanza". Nesos poemes hai variedá métrica y un notable esfuerzu por averase, en bien d'ellos, a los patrones rítmicos de la tradición poética, ensayando versos d'once, doce o trece sílabes anque ensin renunciar al arte menor nin al versu llibre. Quiciabes lo más característico d'esta poesía, qu'a veces parez destinada a funcionar como cantar, seya la so condición anticlimática: Solinca Turbón nun construye los poemes buscando un efectu final que los pieslle arriba, déxalos fluir dando cuenta de lo cotidiano, d'instantes, ensin esparabanes, ensin llevantar la voz. Llamen l'atención positivamente, por poco habituales na nuesa poesía, les referencies a la mitoloxía asturiana, usando d'esta como un elementu cultural más, ensin mistificaciones nin nagaces.
Los últimos cinco poemes de Lliteratura interna son sonetos; l'endecasílabu n'asturianu, como n'español nos tiempos del Marqués de Santillana, ye un versu difícil, que nun grilla de manera natural. Y nun se pue dicir que Solinca Turbón lu domine completamente. Como en dalgunos versos rescamplen los castellanismos ("cuerre y s'esparde'l sangre de la xente", "él les siente anque tape les oreyes"...) da la impresión de que llega al endecasíalbu dende la tradición española en cuenta de facelo dende l'asturiana: si pa dalgo siguen teniendo validez los nuesos clásicos (Hevia, Caveda, Acebal, Pría...) ye pa deprendenos l'arte de la métrica asturiana. Al contra, la media docena de haikus, esi resplandor poéticu en tres versos, da meyor que los otros poemes del llibru la midida de lo que pue ser la poesía d'esta autora, quiciabes porque nesta etapa inicial-y convién la contención de la forma: "Xanes : Peina la brisa / l'arribu d'otru branu, / cancia la fonte".
