A finales de 1976, hai agora cuarenta años, editábase casi secretamente un llibru de cuarenta páxines que resultó ser el primeru de los que se publicaron n'asturianu dientro de lo qu'agora llamamos Surdimientu. N'avientu de 1976, ensin depósitu llegal nin pie d'imprenta (anque da cuenta d'elli la revista "Asturias Semanal" correspondiente), aparecía un llibru apaisáu que se titula Cancios d'Asturies y lleva por subtítulu "Asina canta Camaretá", un colectivu que naz formalmente en Sotrondio en xunu de 1975 llamándose de primeres "Camaretá de cantares populares". Na portada interior del llibru va la relación de los miembros: Teresa Estrada y Aurora Roces (de les que más nada vamos saber), el poeta Xuan Marcos (profesor de secundaria agora yá xubiláu), el poeta Manuel Asur cuando tovía nun firmaba con esti nome, los músicos Manuel Blanco Penayos, Xesús Pedro (que formen más tarde Nuberu) y Manuel González, ensiguida conocíu como Nel Xiblata. El llibru lleva un prólogu ("Aniciu pa una cultura") escritu por Xosé Lluis García Arias: "Nun ye LA CAMARETÁ un grupu qu'ande naguando por La aldea perdida. Ye una xente qu'allampa porque la nuestra Asturies, desendolcándose nel artadal onde apigaza, cuerra a la gueta de la identidá".
Cada una de les cinco partes en que se divide respuende a les inquietudes sociopolítiques d'aquel tiempu. Asina, los "Cancios de llibertá" canten a Victor Jara, al Pozu Funeres, a Mari Luz Fernández -la última presa política del franquismu, hermana de Nel Amaro-, a Miguel Hernández). Como grupu formáu nel corazón de la cuenca del Nalón, la reivindicación del trabayu mineru ta presente en "Cancios de la mina", la lliteratura oral política en "Cancios de la hestoria murnia", lo patriótico en "Cancios d'un país qu'alita", mientres que la última parte, "Otros cancios d'ayeri y de güei" (qu'antecipa'l títulu del primer LP de Nuberu publicáu en 1978), xunta poesía popular, un poema de José Benito Álvarez Buylla (un poeta de posguerra qu'enllaza con esta nueva poesía) y otru de Nel Xiblata, miembru del colectivu.
Nesta modesta edición, un verdaderu cancioneru de grupu, ta la clave de lo que foi el "surdimientu" de la lliteratura asturiana na segunda mitá de los años setenta. Baxo la dirección d'ún de los fundadores de Conceyu Bable, García Arias (que publica los sos poemes patrióticos o prologa les primeres ediciones de llibros marcando'l camín de la reivindicación), nun empresta atención a lo que tán faciendo les lliteratures cultes vecines (la española yá ta falando de novísimos y venecianos, la gallega liquida con Ferrín, López-Casanova y los grupos Rompente y Cravo Fondo la poesía social, dase a conocer Bernardo Atxaga), sinón a una forma de cultura popular que se ta produciendo nel Estáu, la poesía social de los cantautores que ponen lletra y música a la transición. Quiciabes esta sienda política y popular llame más l'atención si pensamos qu'otru fundador de Conceyu Bable publicaba dos años enantes n'español Escrituras materiales (1972), una antoloxía "novísima" (Antonio de las Moras, Ildefonso Rodríguez, Miguel Suárez...). Pudo ser del mayor interés que Lluís Álvarez llegara a intentar daquella dalgo asemeyao n'asturianu, anque namás fuera nel planu teóricu. Cuando en 1980 Sánchez Vicente publique Camín de Señardaes, el so primer llibru, cola pluralidá de voces que caracteriza la so obra, la crítica va celebrar más los poemes políticos que los intimistes, anque tea nestos la superación necesaria de la poesía social.
