Asoleya l'Academia de la Llingua Asturiana'l númberu 116 de la so revista Lletres Asturianes y failo con un conxuntu de trabayos orixinales que presenten el denominador común del rigor y la calidá na investigación y na esposición, cualidaes a les que yá tien avezaos a los receptores d'esta publicación qu'apurre a lo menos dos númberos al añu desde 1982 y tamién ye posible consultar al traviés de la páxina web de l'Academia.
Nesta ocasión, la estaya propiamente llingüística ofrez dos trabayos de llabor cuasi arqueolóxicu: per un llau, "Otros horizontes: la aparición de la lengua asturiana en las cartas privadas de los emigrantes de principios del XX", en castellanu, firmáu por Laura Martínez Martín, ye l'estudiu minuciosu de los rasgos de la llingua asturiana qu'apaecen nunes cientu cincuenta cartes escrites por tres emigrantes asturianos de Pravia, Avilés y Xixón mientres taben n'América, a principios del sieglu XX. Nestes misives, unviaes a destinatarios d'Asturies, puen observase les característiques propies de los falantes que faen un usu diglósicu de la llingua, demostráu n'exemplos de los sistemes vocálicu y consonánticu, asina como n'aspeutos morfolóxicos y sintácticos. D'interés tamién resulta la comprobación de la pervivencia del asturianu, inclusive na distancia, y la querencia por usalu na comunicación ente iguales. D'otru llau, "El sistema de sobredenominación nuna parroquia de Samartín del Rei Aurelio (Cocañín)", de Claudia Elena Menéndez Fernández: una curiosa restrayada de sobrenomes recoyíos anguaño con intención "non exhaustiva, sí representativa", nos llugares d'esa parroquia. La muestra confirma la resistencia d'inda bona parte de l'antroponomástica tradicional, magar que ta en peligru d'estinción por mor del despoblamientu.
Tres artículos de lliteratura conformen el siguiente grupu: "Incidencia del mediu, condicionamientu y estratexes lliteraries n'El cuadernu de rayes de Miguel Allende", de Pablo Rodríguez Medina, un analís pragmáticu sobre l'aniciu y les característiques seique privatives del testu destináu a un blogue de creación lliteraria; "Realidá, memoria y ficción n'Hestoria universal de Paniceiros", por Emilio Frechilla Díaz, al rodiu del conceptu d'autoficción y el trunfu de la memoria y la tradición sobre los fechos históricos nel mundu míticu y verdaderu creáu por Xuan Bello; y a lo último, "Noticia de Josefina Alonso Álvarez: una escritora n'asturianu", onde Vicente García Oliva rescata del olvidu y coloca na nómina d'escritores asturianes a esta colunguesa, de la qu'aporta y estudia poemes que clasifica en dos grupos: los dedicaos a personaxes de la vida social y cultural xixonesa y aquellos de tema asturianu.
Correspuende al ámbitu sociollingüísticu l'interesante estudiu estadísticu fechu por Isabel Hevia Artime y Xosé Antón González Riaño: "Asturianu y castellanu nes aules d'Asturies: usu y actitúes del alumnáu inmigrante y autóctono", una amuesa fecha ente más de cien neños de los cuatro centros educativos con mayor númberu d'estudiantes d'orixe estranxeru matriculaos n'asturianu.
Antón Caamaño Vega firma "Memoria coleutiva y Teatru Asturianu", una parte de la so tesis doctoral Bases pa un Corpus de teatro n'Asturies. Nesta seleición espón les relaciones y les señes que dexa'l teatru na sociedá asturiana y viceversa. Fai un percorríu mui prestosu pelos espacios escénicos asturianos a lo llargo de la hestoria, per obres, autores y actores, amás de recoyer con procuru dellos exemplos de toponimia urbana relacionada col asuntu.
Pa zarrar el volume, seis entraes nel apartáu "Reseñes bibliográfiques", toes elles sobre trabayos espublizaos de recién y la seición "Notes y anuncies", onde s'alluguen les informaciones últimes sobre la institución académica y otres noticies de convocatories, concursos o publicaciones sobre la llingua asocedíes desde'l númberu anterior, amás del yá clásicu apartáu de "Llibrería Asturiana" y les "Normes pa la presentación de trabayos".
