Los diecisiete poemes que conformen Les races del olvidu (Trabe, 2017) valiéron-y el Premiu "Teodoro Cuesta" nel añu 2015 a Marisa López Diz (Xixón, 1970), una artista polifacética con ésitu en delles estayes culturales: lliteratura infantil y xuvenil, cine y música. Tamién poeta esperimentada, igual n'asturianu qu'en gallego-asturianu, ofrez agora'l so tercer poemariu, nel que nun ha d'engañar el númberu escasu de composiciones: guarden cuasi toes elles una densidá grave de tema y de pensamientu que requier tiempu, silenciu y posa mientres pasa la llectura. Estrémense nél dos partes que tamién se complementen: hai equí poesía social y de compromisu cola humanidá actual, "la biografía de los probes", el reconocimientu pal que más necesita unes palabres de compañía y darréu d'ello, una descripción del estáu del alma de la escritora que sufre les contradicciones del mundu que la arrodia.
Toles traxedies diaries-y son pertinentes a Marisa López Diz, que s'asoma con pena intensa y respetu fraternu al drama de los viaxes obligaos d'emigrantes y refuxaos y canta a los sos sentimientos de señaldá y desgarru, tan nobles y tan altos como los de cualquiera de nós: "Cola mano espantaron el mieu, [?] / tres o cuatro pallabres deprendieron / y nes llinies de la mano / plantaron soles / pa nun escaecer nunca / d'ónde veníen". Viaxes que munches vegaes acaben cruelmente nel paraísu d'una playa onde zapatos descalzos "como ataúdes pequeños" recuérdennos a los "escarabayos xigantes" que vía Berta Piñán en "Playa de Tarifa, Cádiz". Na escalada de tristura tamién apaez la esclavitú del trabayu y del abusu infantil en "Guah.es del oficiu", una rotunda composición valiente y dura que denuncia los delitos que se comenten contra estes víctimes indefenses. La revisión de l'actualidá alcuérdase tamién de los problemes económicos del mundu ricu, -frívolos a estes altures-: "Esto ye un atracu" pue ser una bona lletra de canción protesta d'anguaño.
A la vera d'esto vien el contrapuntu inseparable de la parte primera: la desolación personal ante la contemplación de la inxusticia permanente: "Nun escosa'l calce / onde nacen les races del olvidu". En dando voz y sitiu a los olvidaos surde la necesidá de soltar la pena interna, de describir un desconsuelu habitáu por una naturaleza "onde xorrecen llirios de solombra / y tiniebles de maíz", a vegaes nel so estáu más ermu y confusu: "nueches y solombres, / xarabatos y borrayes"; estaos d'ánimu con sabores inhumanos: "tristura de cierzu, tastu a fenoyu"; paisaxes de callada compañía: "la lluz de les aurores / amarrada a la respiración cansada / de viesques y cumales". L'actitú de compromisu escoyida ye permanente, ta xustificada y solo s'asolivia con dalgún paréntesis d'olvidu, necesariu pa siguir. Completa'l conxuntu dalguna visión global del sentíu de la vida y de la muerte, con definiciones que traten d'aproximase a describir, por exemplu, el momentu inciertu y esencial que ye'l fin de la esistencia: " ¿Sedrá escaecer dafechu / la forma esauta de les coses / y alargar les manes / pa nun tocar yá nada?", y l'agradecíu homenaxe final a los momentos lliterarios, firmaos por dellos autores, que la faen persona y escritora.
Les races del olvidu ye nueva poesía desarraigada, social, sometida a un llirismu mui particular, fechu de metáfores lorquianes, de sinestesies cotidianes, de personificaciones que nos fai evidentes la sensibilidá de la escritora. Fondamente emotivu, musical, con dalgunos poemes memorables destinaos yá a valir d'exemplu de bon exerciciu poéticu.
"Siento cayer el mundu / como la voz de la formiga / nel paisaxe blancu del azucre". Vuelve a sentise, alta, la voz del silenciu.