Estos díes los medios de comunicación fanse ecu de la llegada del antiprogresu: móviles de los "antiguos" que nun tienen tantes aplicaciones pa volvenos llocos, comida ecolóxica, eso sí, más del doble de cara que la que consumimos davezu, retiros, meditación, atención a la espiritualidá, "coach"?
Too ello tan abandonao nes últimes décades. Lo retro ta de moda. Con tantu bombardéu de tou tipu, desconfiamos de qué ye lo qu'hai detrás. Sicasí, la señardá del pasáu, siempre foi dalgo que nos acompaña lo llargo de la vida, sobre too cuando tenemos unos cuantos años enriba y nos cuesta adautanos a un mundu que camina a galmiaes, llevándose too per delantre.
Ta visto que tendemos a escaecer lo malo, lo qu'en dalgún momentu nos mancó, y a recordar lo meyor. Quiciabes ye una defensa contra lo que yá pasó y nun tien remediu, pa que nun nos faiga mala sangre.
Sieglos atrás médicos suizos idearon un tratamientu contra la señardá y la tristura, que daquella yá se consideraba una enfermedá.
Güei munchos años dempués seguimos enfermando d'esta gafura, quiciabes con más frecuencia, ya intentando nun padécela con miles de recetes preventives, como dietes, exerciciu, pastielles de tou tipu pa suplir tolo que, supuestamente, nos falta nel organismu.
Dempués de volvenos llocos con esti tingláu de recetes y tratamientos, milenta tipos de dietes y per otru llau comies prefabricaes, comida basura a mamplén y demás recomendaciones, siguimos lluchando contra'l malestar del alma, que s'agrava per momentos nesti mundu de prieses y egoísmu, de violencia y atropellos, de sálvese quien pueda y onde hai qu'andar buscando escuchadores, porque escasia la xente que nos dedique unos minutos d'atención, qu'amuese empatía y se ponga nel llugar de los demás.
Esta gafura espiritual agrávase cola edá, nesti mundu superfluu, onde la xuventú y la guapura, l'aspeutu físicu, ye lo que se valora y se tien en cuenta. Onde se quier uniformar a la xente con cánones de guapura que namás algamen unos cuantos a fuerza de sacrificiu, amaños, amestadures y postizos de tou tipu. Sin tener en cuenta que toos somos diferentes y tenemos la nuesa forma de ser.
Y con too esto, nesi mundu d'atropellu físicu y sicolóxicu, agora dícennos que l'antiprogresu ta picando na nuesa puerta.
Pero nun sé si queremos nin seremos quien a volver p'atrás, nun sé quién serán los que determinen dise pal campu a la gueta d'una vida más tranquila, y a vivir de lo que semen nel güertu, porque la mayor parte de la xente qu'agora llega a los pueblos son más bien "urbanites" a los que nun conocen los vecinos, nin saben siquiera'l so nome, y que zarren con una sebe la casa pa que nun los vean. Asina que la soledá tamién amaga nel campu, y nel mediu rural, que per otru llau tien abondes dificultaes pa sobrevivir y onde s'empieza a notar la falta de la mocedá y de l'allegría. A la vera d'estes cases pantasmales, otres cases esbarrúmbense y con elles la memoria del pasáu.
Too estes miseries sociales tán causaes, en cierta manera pola incertidume de la xente, el mieu a perder el trabayu, los trabayos basura, los desahucios, y la perda del bienestar que quiximos qu'heredaren los nuesos fíos, pero vemos cómo esa herencia s'esfarrapa por momentos y el futuru tórnase inciertu.
Lo que si sabemos ye que'l ser humanu va a la gueta de la felicidá dende siempre, pero cada vez vamos convenciéndonos de qu'esta sociedá de consumu nun ye más feliz.
Nun fai falta ser filósofu pa ver que la felicidá nun depende nin de los avances teunolóxicos, nin del progresu. Según va pasando'l tiempu vamos comprobando al nuesu alredor que la felicidá ye fugaz, pasa nun tris, visítanos a pequeñes dosis. Hai un dichu mui duru que nos alvierte " Nun hai corazón que descanse".
Dichu que sigue vixente magar vivamos güei na era d'internet, de les teunoloxíes, de los "robots" y de tolo que nos espera nun futuru non mui llonxanu.
La gafura del alma reclama dalgo más cercanu ya íntimu que nos allivie la tristura y la señardá que nos castiga más que nunca.
