Acuérdome d'un compañeru docente, carca ultramontanu y preconciliar, que se tiraba de los pelos cuando, a últimos de la década de los 80, los sindicatos de la enseñanza convocaron güelgues contra'l ministru socialista del ramu, José María Maravall. Un home de dereches como él, ¿qué tenía qué facer naquella coyuntura?, ¿cómo diba atender la llamada de les hordes sindicaleres? Pero, si la desoyía, ¿nun taba dándo-y la razón a un gobiernu roju? Alcontrábase nun dilema desesperante, irresoluble.
Pol estilu ye la situación creada estos díes pol Tribunal Constitucional cola sentencia que-y da la razón a la FSA cuando, en 2006, suspendió de militancia a Susana Pérez-Alonso por manifestase nun mediu públicu (que fue esti diariu, nuna carta abierta) contra'l partíu: nun hai bandu del que se poner.
D'un llau, el tribunal falla imponiéndo-yos a los afiliaos fidelidá de palabra a les sigles, que ye más de lo que ningún xuez-y puede pedir a un matrimoniu. Amás, considera que la carta que Pérez-Alonso publicó en LA NUEVA ESPAÑA usaba "expresiones que pueden legítimamente considerarse atentatorias contra la imagen externa del partido" (¿la imaxe d'un partíu políticu nun ye siempre esterna?). Yo, qué quier que-y diga, nun veo, nel escritu de Pérez-Alonso, mayores atentaos que los que perpetra contra la sintasis. A mi paezme un testu hipercolesterólicu d'egolatría y mui mal redactáu (atención, que la firmante presume de carrera literaria). Pero, inxuries, ofenses d'una gravedá tal como pa que'l Constitucional bendiga una mordaza, nun les atopo. Vista con indiferencia, que ye como meyor se ven les coses, abulta una sentencia represora.
D'otra manera, hai que suponer que Pérez-Alonso, cuando sacó'l carné, lleería los estatutos del PSOE, que bien a lo primero, nel artículu 8, dicen: "El afiliado o afiliada que [?] falte al programa o a los acuerdos o resoluciones del Partido, exprese públicamente sus opiniones en términos irresponsables o con deslealtad al Partido [?] será sancionado, previos los trámites reglamentarios y mediante decisión de los órganos competentes, con medidas que podrán llegar hasta la expulsión en aplicación de las normas internas vigentes [?]" Quier decise que la litigante frustrada tenía que saber, cuando pagó la primer cuota mensual, que taba vendiendo l'alma al diablu, qu'entregaba la so independencia de pensamientu y opinión supónse que nel ara d'un cultu que tendría más valor que'l sacrificiu que-y facía. Nun hai sitiu pal berrinche, la FSA limitóse a aplicar l'acuerdu qu'ella rubricare afiliándose.
El miércoles, a ríu revueltu, Jesús Gutiérrez, secretariu d'organización de la FSA, aprovechó pa recorda-yos sibilina y amenazadoramente a los sanchistes asturianos que "los casos que se están enjuiciando ahora son infinitamente más graves que lo que ella [Pérez-Alonso] haya podido decir en su momento". Y nun cuenta mentira: "los casos" actuales pueden acabar retirándolu a él y a l'actual cúpula socialista, l'autonómica y la estatal (que se solapen en parte), cosa que taba mui, pero mui percima de les fuerces de Susana Pérez-Alonso en 2006.
Diz Gutiérrez que "no es socialista el que le pierde el respeto a otro", y escribía Pérez-Alonso, va once años, que "no hablar, no decir lo que se siente, es muy poco socialista". Nun son afirmaciones incompatibles. Hasta valen cambiando "socialista" por "popular", "cristianu", "esportinguista", "vietnamita"...
