Ye fastidiada la papeleta de Gaspar Llamazares. Él mesmu se da por sentenciáu pola cúpula estatal d'IU. Si esi ye'l rumbu inevitable de los acontecimientos, ¿procede dir a la guerra abierta, dividir el votu de la izquierda con una sigla nueva nun momentu electoral críticu? El dilema que se-y plantea ye heroicu, como heroica ye la renuncia tanto o más que'l combate.
Hubo un tiempu que, namás el pelu de Llamazares, valía 25 millones de dólares pagaderos pol FBI (acuérdese de cuando lu usaron pa pone-y cara a Bin Laden). Agora, el líder milenial del PCE dalu de baldre, a él, que remataba la reciente carta pública que-y dirixó a Garzón (Alberto) recordándo-y que siempre tuviere militando "a las duras y a las maduras". Yo nun sé cuándo fueron "las maduras" d'IU. Nun m'acuerdo: igual andaba despistáu con otros intereses. Sí tengo memoria de que les eleciones que coincidieron cola secretaría xeneral de Llamazares fueron les más dures d'ente les dures: tres diputaos en 2004 y el triste y solitariu Gaspar en 2008. Con Cayo Lara y, depués, Alberto Garzón la cosa tampoco dio pa tirar voladores, pero la miseria parlamentaria nun volvió a ser tanta. Nun s'interprete qu'esti ignorante que firma ta dando a entender que fue Llamazares la causa de la debacle. Yo digo, namás, que coincide qu'él, naquel momentu, pasaba per ellí.
Pero nun nos puede caer embaxo que, en términos porcentuales, los resultaos de la coalición n'Asturies fueron y siguen siendo mui superiores a los del conxuntu d'España. Esto traime a la cabeza a Jerónimo Granda, qué quier que-y diga. A Jerónimo, que trunfaba nesta tierra nuestra de balcón municipal en balcón municipal, hubo una época que tamién lu engañaron cola Meca madrileña pero, como ye un paisanu razonable, diose cuenta a tiempu y volvió a los paseos estivales pela playa de Xixón, que ye onde meyor se ta. Llamazares nunca tornó. Ronda físicamente per equí, sí, y posa les ñalgues nun escañu del parlamentu autonómicu, pero ye una ilusión óptica. Discúte-yos a los de la capital l'autoridá que tienen sobre les sigles astures pero nun ye pasión localista de retornáu. L'espíritu tienlu onde tea la guerra y, anque alguna engarrada tamién se lluchó pal norte del Negrón, la batalla qu'él llibra decídese a la oriella del Manzanares.
La inevitable cita cultural qu'incluyía la carta de Llamazares a Garzón yera de Bertolt Brecht. Esa escoyeta, esa preferencia, esplica coses. Los que tenemos unos añinos acordámonos d'aquel cantar de Silvio Rodríguez qu'empezaba col recitáu d'unos versos del autor alemán: "Hay hombres que luchan un día y son buenos. / Hay otros que luchan un año y son mejores. / Hay quienes luchan muchos años y son muy buenos. / Pero los hay que luchan toda la vida: esos son los imprescindibles." "Sueño con serpientes", titúlase la canción, que se popularizó n'España (ente'l sector progre de la España de la transición, evidentemente) a finales de los 70 y primeros de los 80, cuando Llamazares yera un chaval que transitaba ente la facultá de Medicina y el PCA, la edá na que se conformen los mitos personales. La idea del combate inacabable qu'espresaba Brecht y predicaba Silvio Rodríguez convirtióse en marca identitaria p'aquella izquierda xuvenil. Llamazares, tamos viéndolo, sigue fiel a ella, vieyu rockeru "forever young", anque l'enemigu contra'l que lluchar adopte, últimamente, formes inesperaes, cainites. Nel contestu actual paez que nun se trata de quién tien razón (que, lo más seguro, nun-y falta a Llamazares cuando anuncia la destrución programada d'IU) sinon de ser fiel a la consigna de la mocedá: nun se dar nunca pa ser de los imprescindibles. ¡Qué cansanciu! Y tampoco hai que s'engañar. Brecht o la Biblia, da igual: ningún testu ye sagráu. Naide ye imprescindible.
miliorodriguezcueto.wordpress.com