La portavoz del Gobiernu asturianu, Melania Álvarez, anunció esti vienres pasáu que la Conseyería de Salú yá trabaya en midíes nueves "riguroses, contundentes y proporcionaes" énte l'avance del andanciu, que n'Asturies yá ta evolucionando "de manera mala y esmolecedora".

Según Álvarez, esti avance ye porque la "ciudadanía se relaxó". "Nun lo fiximos tolo bien que tendríemos que facelo", resaltó, pa depués sorrayar que "equí tenemos les consecuencies" y pidir a la ciudadanía que s'autoconfine. Na rueda de prensa posterior al Conseyu de Gobiernu, la portavoz del Executivu esplicó que la intención ye tomar midíes con "la axilidá mayor posible" pa frenar l'aumentu de contaxos.

Salú, remarcó, trabaya "ensin fuelgu" dende hai díes nel diseñu de la respuesta a la tercer fola na qu'Asturies yá ta. Les midíes nueves van aplicase la selmana que vien. Trátase, dixo, de midíes "mui precises" pa evitar interpretaciones enquivocaes.

Sobre'l pidimientu del Gobiernu autonómicu al estatal pa tener la capacidá de confinar a la población, Melania Álvarez esplicó que la solicitú nun ye p'aplicar "darréu" esta midida, sinón pa tener capacidá de recurrir a ella si la situación empeora. "Vamos anticipaos pa frenar los efectos d'esta tercer fola primero que nos lleve per delantre", dixo.

USUARIOS DE LA MISTA DE XIXÓN VAN RECIBIR A PARTIR DEL LLUNES LA SEGUNDA DOSIS DE LA VACUNA

La tamién conseyera de Derechos Sociales y Bienestar avanzó esti vienres que'l llunes 18 de xineru va principiar l'aplicación de la segunda dosis de la vacuna de Pfizer na residencia Mista de Xixón, primer centru nel que s'empezó a alministrar la vacuna.

Sobre la vacunación, Melania Álvarez señaló qu'avanza "a ritmu bonu" n'Asturies, con más de 30.000 persones inmunizaes. Nes residencies el porcentaxe de persones que refugaron la vacunación ye del 9% y el Gobiernu espera qu'ente'l personal sanitario esti númberu sía "anecdótico".

Per otru llau, en referencia al casu conocíu esti vienres de los padres d'una trabayadora d'una residencia en Xixón, que recibieron dosis sobrantes de la vacuna, la conseyera esplicó que se solicitó al centro información p'asegurar que se siguió'l protocolu "en tou momentu".

Esti protocolu, esplicó la portavoz, establez qu'a cada centru lleven les dosis xustes de vacuna que se vaigan a alministrar. En casu de que sobren dosis por "dalguna incidencia" contemplen que s'alministren a los equipos de vacunación y personal sanitario que tea nesi momentu nel llugar, porque una vez estrayíes del vial nun ye posible tresportales a otru llugar, según informa EUROPA PRESS.

“Cola ayuda de la Conseyería de Cultura, Política Llingüística y Turismo del Principáu d´Asturies”.