Al norte del Virxinia Occidental, metanes el cordal norteamericanu de los Apalaches, hubo más Asturies de la qu'hai agora: les güelgues de los trabayadores castrillonenses del cinc que s'afincaron a empiezos del sieglu pasáu nel condáu de Harrison, en localidaes como Spelter (trescientos y picu habitantes nesti momentu), Bridgeport (alredor de seis mil) y Clarksburg (diecisiete mil), vanse difuminando, pero la memoria sigue viva na comunidá dixital qu'empobinenen Art Zoller Wagner, Bob Martinez y Ron Gonzalez. Los tres, americanos de pro, caltienen la so asturianía con devoción infrayable. Los tres celebren con aliviu'l cambéu na Casa Blanca pa ver “si curen les feríes sangrantes” del asaltu al Capitoliu.
Los tres son nietos d'asturianos d'Avilés, de Castrillón, de Gozón. Los trés yá tienen nietos, pero va casi dos décades –cuando internet taba en pañales– axuntaron nel foru “AsturianUS” a tolos herederos de los asturianos qu'atoparon, na xigantesca fundidora de cinc Grasselli Chemical Company, el futuru que perdieren tres les fuelgues selvaxes na factoría d'Arnao de la Real Compañía Asturiana de Mines (RCAM), nos primeros años del sieglu XX.
“Los postreros cuatro años fueron un desastre pa Estaos Xuníos. Donald Trump inclinó esti país escontra una visión del mundu desaxeradamente egoísta y mezquina y, sicasí, un númberu considerable de ciudadanos estadounidenses paez apreciar la visión retrógrada de Trump”, llaméntase Wagner, qu'atendió a LA NUEVA ESPAÑA dende Maryland, que ye onde vive anguaño.
“Los sucesos del 6 de xineru emburriáronlos Trump y los sos collacios. Vivo nun país que m'aborrez pol mio nome. El supremacismu blancu medra y a l'expresidente usa dél. Joe Biden ye un home que me gustó mientres años: tien respetu per caúnu de nós, ye un soplíu d'aire fresco”, señala Ron Gonzalez, que caltien los sos raigaños en Virxinia Occidental.
“Los mios güelos asturianos emigraron a Estaos Xuníos en 1913 y fixéronse ciudadanos nos trenta. Gracies a la llei de la Memoria Histórica, soi ciudadanu de dambes dos naciones. Les mios creencies y valores siguen colos de los mios padres y güelos. N'España y n'Estaos Xuníos voto por quien meyor puede llograr el bien pa los mios conciudadanos. Magar Biden nun garantiza qu'Estaos Xuníos va avanzar escontra la paz, na xusticia a lo menos el procesu empezó”, conclúi Bob Martinez.
