El tiempu paez detenese na Casa de Graña, en Vixande. Esta pimpana casona del sieglu XVIII, una de les edificaciones más emblemátiques del conceyu veigueño, caltien intactes munches de les sos estancies y dexa viaxar a otra dómina ya imaxinar el poderíu que tuvo esta impresionante construcción, que foi see del comerciu arrieru de la contorna.
“Equí ye too enorme y esi ye'l problema”, diz la madre del actual propietariu d'esta casona llevantada en 1750 por Pedro Lastra, que por eso tamién se conoz por Casa de Lastra. Del titular primeru pasó a manos del so fíu Benito que, de la mesma, dexó n'heriedu a Alejandro Lastra. Ésti últimu casó con Modesta Graña y, dende entós ta en manos de la mesma familia. L'inmueble tuvo habitáu hasta va una década y, agora, busca comprador, anque los dueños prefieren nun falar de cifres porque tán abiertos a negociar y a estudiar cualquier ufierta.
Nun-y faltaron pretendientes nos últimos años, anque nun terminó de cuayar alcuerdu nengún, asina que los Graña acoriquen l'edificiu pa evitar el so deterioru. “Facemos lo que podemos pa caltenela y que cuando menos nun tenga goteres”, confiesa la propietaria, a la que se-y van les hores “afayando curaxes” d'esta magna edificación. Sobre'l palaciu hai infinidá de lleendes y rumores, pero bien poques certidumes, porque nun se fixo nunca una investigación rigorosa sobre la hestoria o el papel que xugó a lo llargo de los años esti edificiu de 4.000 metros cuadraos construyíos (1.000 metro per planta).
“Equí pierdeste nel tiempu”, señala la propietaria y nun-y falta razón. Hai estancies qu'impresionen especialmente, porque caltienen dende mobiliariu o prendes de la dómina a los más variaos oxetos antiguos, como un bote de pastilles o antigües montures. Tamién tien una lareira tradicional d'importantes dimensiones. Y ye que, nun yera una vivienda al usu, sinón más bien una especie de centru comercial de la dómina, na propiedá teníen taller de carpintería, forxa, cortes, molín, tenaes… Na entrada principal alcuéntrase una capiya n'honor a San Nicolás y, en tiempos de rellumanza de la casona, llegó a tener cura propiu. Otra cosa interesante ye'l retablu, de 1784.
“Dicíen que se podía llegar hasta La Coruña solo travesando propiedaes de la casa”, añede la dueña faciendo referencia al poderíu que tenía la casona. Ello ye que tamién cuenta qu'ente la documentación que tien recoyida na so casa hai una carta d'Alfonso XIII solicitando a la entós propietaria, Modesta Graña, permisu pa braniar nel palaciu, daqué a lo que la muyer, siempres bien discreta, se negó.
Una de les lleendes más famoses que pesen sobre l'edificiu ye la que diz que cuando se construyó tenía 365 ventanes y qu'un rei mandó cerrar dalguna por que nun superara al Palaciu Real. “Creo que más que ventanes son buecos, pero nun los cunté y entá toi alcontrando dalgunos agora”, señala la muyer.
De la Casa de Graña nun impresionen namás les sos estancies interiores, con suelos de castañal y hasta frescos orixinales en delles parés, sinón tamién los esteriores. Caltiénense cabazos, fontes y hasta un llavaderu. La casa ye una oportunidá de somorguiase na vida d'antaño y poder cruciar les sos puertes, un auténticu privilexu.
