La Fundación Valdés-Salas confirmó va unos díes que'l descubrimientu d'un garapiellu de fragmentos cerámicos nes campañes d'escavadures feches en 2019 y 2020 nel castru d'Alava (Salas) confirmen la esistencia nesta zona d'un taller metalúrxicu con manipulación de cobre y plata na Edá del Fierro. El datu, apunta la entidá, contribúi significativamente “a la conocencia de les actividaes económiques de los habitantes del castru, confirma la maña de los sos artesanos y resulta de particular relevancia nel contestu del Noroeste peninsular, onde'l trabayu de la plata nos sieglos previos a la conquista romana taba escasamente representada”.
L'estudiu arqueométricu en cursu ta fechu por Ignacio Montero y Óscar García-Vuelta nel Laboratorio de Microscopía Electrónica y Microanálisis del Instituto de Historia del Consejo Superior de Investigaciones Científicas (CSIC). Los resultaos preliminares, apunta la fundación, permitieron constatar la esistencia n'Alava na Segunda Edá del Fierro (sieglos IV-II a. C.) d'un taller metalúrxicu que trabayó metales de base cobre y plata.
Pal estudiu de los restos metálicos emplegose la técnica d'espectroscopía d'enerxía dispersiva por Fluorescencia de rayos X, aplicada con espectrómetros portátiles, utilizándose tamién microscopía electrónica de barríu. Y el afayu de chiscadures de plata na superficie d'estes cerámiques “constitúi un testimoniu arqueolóxicu escepcional, por que a la entreseca d'esti metal nel rexistru arqueolóxicu del noroeste peninsular axúntase l'antigüedá que revela'l contestu de recuperación de les pieces”, apunta la Fundación Valdés-Salas al traviés d'una nota.
La entidá añede que la investigación sobre les pieces prosigue anguaño, tando en marcha otros procedimientos arqueométricos, “como l'analís por isótopos del plomu, que va dexar apurrir nueva información sobre la procedencia de les materies primes emplegaes y los xeitos de producción d'estos talleres metalúrxicos prerromanos”.
Les xeres arqueolóxiques nel castru de la localidá salense entamaron en 2018 y cola dirección de campu a cargu del arqueólogu Rubén Montes. Enmárquense nel Proyecto Beriso y tán afalaos pola Fundación Valdés-Salas, que comparte patrociniu cola Fundación Banco Sabadell y la empresa minera Orovalle Minerals. Na iniciativa collaboren tamién el Conceyu de Salas, les Universidaes d'Uviéu y Granada y el Instituto de Historia del Consejo Superior de Investigaciones Científicas al traviés del proyectu I+D+i del Ministerio de Ciencia e Innovación denomináu “LOKI. Economíes locales, economía imperial: L'occidente de la Península Ibérica, sieglos II a. C.-II d. C.”, que dirixe la doctora Inés Sastre.
El proyectu tien por oxetivu cimeru l'estudiu del patrimoniu arqueomineru y del poblamientu arreyáu en dómina protohistórica de la contorna de Salas y Belmonte. Cuenta cola dirección científica del Catedráticu de Prehistoria de la Universidá d'Uviéu Miguel Ángel de Blas, y del especialista n'arqueoloxía castreña del Muséu Arqueolóxicu d'Asturies, Ángel Villa Valdés.
