Los lechazos criaos nos montes del parque nacional de los Picos d'Europa abren buecu na alta cocina. Los animales, que cunten col sellu calidable Pro-Biodiversidad impulsáu pola Fundación para la Conservación del Quebrantahuesos, van empezar a sirvise nos Paradores Nacionales de Turismu d'Asturies y Cantabria esti mesmu mes.
La idea “ye fomentar y cohesionar la vinculación esistente ente'l caltenimientu de la biodiversidá y el desenvolvimientu sostenible rural al traviés del sofitu y promoción d'una actividá ganadera tradicional qu'ayuda a caltener la biodiversidá y que ta en crisis, social y económicamente”, esplica'l director del Parador de Cangues d'Onís, José Ignacio Bosch.
Paradores algamó a finales de 2019 un alcuerdu pa comercializar esti esclusivu productu nos sos establecimientos d'Asturies y Cantabria. Pero'l zarru en marzu de 2020, por causa de la crisis sanitaria del coronavirus, torgó poder entamalo enantes.
“Agora, col entamu de la campaña 2021, los lechazos de la primera paridera van suministrase a l'aguada asturiana de los Picos d'Europa, colo que se preve que van tar nos Paradores de Corias, de Xixón y de Cangues d'Onís hasta depués de Selmana Santa. Los de la segunda paridera, que s'enllarga d'abril a mayu, van destinase a l'aguada cántabra y van poder tastiase nos Paradores de Fuente Dé, de Limpias y de Santilla del Mar”, detalla Bosh.
Y nun ye solo cosa d'ufiertar la máxima calidá. Tamién pretenden afondar nes posibilidaes culinaries d'estos animales. El chef Santos Vicente, xefe de cocina del Parador de Cangues d'Onís, encamienta caltener les recetes tradicionales, pero rescatar tamién “la receta de la caldereta con patatos que davezu ellaboren los pastores n'altu'l monte”.
Paradores “sofita decididamente esti proyectu de producción de lechazos criaos de manera natural, saludable y sostenible nos montes de los Picos d'Europa pa la so posterior comercialización al traviés d'un sistema de vienta directa que garantiza que la carne llegue al consumidor de manera axilosa y nel momentu óptimu pal so consumu”, aplaude'l director del establecimientu.
El so planteamientu defende'l papel del ganaderu nesti procesu al esaniciase los intermediarios, “colo que'l productor cobra un preciu xustu apautáu ensin que medre'l costu al consumidor”. Amás, la iniciativa supon envalorar el modelu de ganadería estensiva.
Rescampla tamién nesti proyectu otra circunstancia: que los subproductos ganaderos que se xeneren tres el sacrificiu de los lechazos (restos óseos y coraes non comerciales) aprovéchense como alimentu pa les especies necrófagues como'l frangüesu, en cuenta de refugase. A esta iniciativa tán venceyaos anguaño 13 ganaderos d'Asturies y Cantabria y tamién s'implicaron les cadenes de supermercaos Alimerka y Lente. Un apueste que, tal que destaca Bosch, “coincide coles estratexes de la compañía d'impulsar el desenvolvimientu sostenible, económicu y social de los llugares nos que s'alluguen los nuesos hoteles apostando por proveese de productores locales”.
La iniciativa Pro-Biodiversidad llogró en 2020 el Premiu Natura 2000 como'l meyor proyectu européu de caltenimientu de la naturaleza na so sección de Beneficios Socioculturales”.
