Pasiar per Uviéu depués de visitar la esposición “La ciudad despierta” –Sala SabadellHerrero; 653 fotografíes de la capital asturiana ente 1858 y 1978, procedentes de los fondos del Muséu del Pueblu D’Asturies– abre los güeyos a un pasáu urbanísticu yá sumíu y permite dexase llevar pola apaición daqué fantasmal de cais, xentes y edificios qu'agora yá viven namás neses aneyes imaxes. La selección de les semeyes pa l'amuesa, abierta hasta'l próximu domingu 21 de febreru, foi trabayosa y munches quedaron fora. Ye'l casu de les qu'apaecen nesta páxina, que formen parte d'un álbum fecháu n'ochobre de 1904 y que na esposición nun s'amuesa íntegru. El conteníu d'esti álbum, que recupera parcialmente LA NUEVA ESPAÑA, ye obra de Manuel Rivero Balbín (Seloriu, Villaviciosa, 1861-1938) y amuesa la capital asturiana nos primeros años del sieglu XX, con imaxes sorprendentes del estáu que presentaba entós Santa María del Naranco, con espadaña, o la entrada de los obreros na fábrica de La Vega, onde trabayaba tamién l'autor de les imaxes.
Rivero Balbín pertenecía a una familia acomodada de Seloriu. Yera'l segundu de cinco hermanos. “Los sos hermanos Luis y Mariano fueron médicos y el so hermanu Francisco foi inxenieru de Caminos. Él foi oficial del Cuerpu d'Artillería; cuando morrió tenía la graduación de xeneral honorariu”, indica'l comisariu de la esposición, Francisco Crabifosse. “Tuvo destináu en Mallorca, Mahón, Trubia y n'Uviéu. En 1895 marchó pa la Fábrica de Trubia a la Fábrica d'Armes d'Uviéu, onde tuvo cuando menos hasta 1905”, añede Crabifosse. “Yera aficionáu a les artes y a la fotografía. Facía semeyes estereoscópiques, en 3D, que yera la fotografía que practicaben los bonos aficionaos de la dómina, buscando llograr imaxes cola mayor realidá posible, y tamién autocromos, que son les primeres fotografíes en color de la hestoria, que se facíen con un sistema inventáu polos hermanos Lumière en 1903, que se comercializó a partir de 1907”. Anque nun ye del álbum, reproduzse nesta páxina ún d'esos autocromos. Ye una de les primeres imaxes de Santa María del Naranco, la fachada sur p'hacia 1910, una cesión fecha al Muséu por Andrés Piñera.
