La pandemia camuda los vezos de consumu. El Consorcio de Gestión de Residuos Sólidos de Asturias (Cogersa) xestionó'l añu pasáu un total de 860.491 tonelaes de borrafes nel so centru de Serín, lo que supón un amenorgamientu aproximao del 4% al respective de les trataes nel añu anterior. Un descensu que dende Cogersa atribúin al cambéu de les pautes de consumu derivaes de l'actual crisis sanitaria y a la cayida de l'actividá económica de resultes del estáu d'alarma.
Daqué más de la metá d'esta cifra, 479.751 tonelaes, correspuende a unvíos municipales. Del global recibíu nel centru de tratamientu de borrafes, 7.800 tonelaes yá provienen del llamáu cubu marrón; ello ye, son biorresiduos orgánicos. La recoyida d'esta basura medró un 34,5% y trátase d'ún de los capítulos sobre los que más va incidir Cogersa nos próximos meses.
El vicepresidente y conseyeru d'Alministración Autonómica, Mediu Ambiente y Cambéu Climáticu, Juan Cofiño, presidió la xunta telemática de la comisión delegada y del conseyu d'alministración de Cogersa, a la que tamién asistieron, ente otros, la viceconseyera de Mediu Ambiente, Nieves Roqueñí, y la xerente del consorciu, Paz Orviz.
El conseyu d'alministración del Consorciu que xestiona'l tratamientu de les basures n'Asturies dende fai más de 36 años analizó tamién les cifres de borrafes sanitaries del pasáu exerciciu, nel que se recoyeron 25.023 contenedores, una cifra que supón un aumentu del 242% frente a los 7.315 de 2019. Esta importante medría tamién ye consecuencia de la pandemia provocada pol covid-19. En tonelaes, algamáronse 1.174, un 119 % más qu'en 2019.
Tocantes a los conceyos, Sobrescobiu foi, otra vegada, el conceyu que más borrafes recicló, cerca del 39 %, siguíu de Somiedu, un 35%; Carreño, el 34%, y Xixón, el 33%.
Per otra parte, el conseyu d'alministración de Cogersa axudicó dellos contratos, por un importe de 2,8 millones, destinaos, ente otros asuntos, al caltenimientu y operatividad de la flota de vehículos del Consorciu, la recoyida y tresporte de borrafes especiales o l'alquisición de diversos reactivos utilizaos nos procesos de tratamientu de basures.
Amás, el Consorciu dio cuenta de la concurrencia a convocatories de proyectos pal desenvolvimientu de distintes iniciatives anovadores en materia de borrafes. En concretu, atropóse, xunto con otros socios rexonales, financiamientu al traviés de los programes Green Deal y Misiones del Principáu pal desenvolvimientu de los proyectos denominaos “Asturies Circular Paradise” (Circast), “Agroalimentación 0 Emisiones” y “Economía circular de les materies primes estratéxiques p'Asturies” (Maprestas).
Cogersa tamién ta trabayando nel afitamientu d'aliances públicu-privaes que dexen a la entidá aportar a los fondos del Plan de Recuperación, Tresformamientu y Resiliencia, col envís de dar soluciones avanzaes a los fluxos de borrafes procedentes de procesos de tratamientu y amenorgar asina drásticamente'l depósitu en vertideru.
Nueva planta
Cogersa axudicó en 2018 la construcción de la nueva planta de tratamientu de basures en Serín en 58 millones d'euros. La nueva instalación va tener capacidá pa xestionar unes 300.000 tonelaes al añu de borrafes doméstiques, otres 25.000 d'avolumaos como, por casu, muebles, y 50.000 más de borrafes industriales consideraes non peligroses. El consorciu de xestión de les basures tamién entamaba nesta mesma intervención el recrecíu del vertideru, dientro de la mesma faza de 400 hectárees allugada nel corazón d'Asturies.
