Nel balneariu de Les Caldes faen bona la máxima de que toa crisis puede convertise n'oportunidá. Los responsables del equipamientu inauguráu en 1776 tán aprovechando'l parón turísticu pa entamar una ambiciosa rehabilitación de delles dependencies, ente les que destaquen les meyores feches nel salón de los espeyos, una estancia construyida a finales del sieglu XIX y de conocida riqueza arquitectónica.
El salón conserva tol rellumu de la dómina, calteniendo les llámpares orixinales, los espeyos y los llenzos del techu. Ta decoráu con frescos d'Arboleya, Castañeda y del Río, y na so dómina acoyó bailles y grandes conciertos empobinaos a l'alta sociedá que visitaba'l balneariu. Cuenta tamién con grandes arañes de bronce colgaes del techu y amplios espeyos nes parés.
Anguaño, los trabayos de rehabilitación tán centrándose na recuperación de les columnes y puertes, y tamién nos espeyos recubiertos con pan d'oru. “Prevemos que los trabayos s'allarguen un par de meses”, indica'l director del hotel, Fernando Sánchez Vallina, sorrayando la importancia d'aprovechar l'ausencia de visitantes pola mor del coronavirus p'acometer unes meyores empobinaes a atraer más visitantes cuando pase la pandemia.
El complexu turísticu adquiriólu na primavera de 2019 l'operador balear Grupu Roxa, según fontes cercanes a la operación, por unos doce millones d'euros coles mires de dar una vuelta al so modelu de negociu y atraer más visitantes.
