La hestoria de los primeros marinos españoles que pudieron triyar les mariñes de l'Antártida en 1819 rescatóla la editorial de cómics históricos “Cascaborra”, nun álbum que salió a la vienta'l 25 de febreru y que lleva por títulu'l nome del buque de guerra nel que navegaben, “San Telmo”. El cordobés Sergio Galisteo encargóse de les ilustraciones y el guión foi cosa de l'asturiana Alicia Vallina, doctora n'Hestoria del Arte y miembru del Cuerpu Facultativu de Conservadores de Museos del Estáu.
El “San Telmo” foi ún de los buques de guerra de la División del Mar del Sur, qu'el 11 de mayu de 1819 salió del puertu de Cádiz con destín a Lima p'afuxar los llevantamientos pola independencia nos territorios de la Corona española n'ultramar.
Alicia Vallina cunta qu'el navíu construyérase'l 20 de xunu de 1788 nos Reales Estelleros de Esteiro d'El Ferrol y tenía unu de los meyores diseños navales de finales del sieglu XVIII. Con 52 metros d'eslora y 14,5 de manga, quilla de carbayu y dos pontes pa l'artillería, diba forníu con 74 cañones y algamaba una velocidá máxima de 14 nuedos. El brigadier Rosendo Porlier y Sáenz de Asteguieta dirixía la División y Joaquín de Toledo y Parra púnxose al mandu del “San Telmo”, con una tripulación de 644 homes.
Les cuatro embarcaciones de la División llegaron xuntes al mar de Drake pero les envernaes y les nubes acabaron por espardiles y causar graves daños nel “San Telmo”, que nunca llegó a puertu.
De la desapaición y el fundimientu del “San Telmo” escribieron autores como Antonio de San Martín en “Viaje a la eternidad”, en 1883, y Pío Baroja, nun artículu publicáu nel diariu “Ahora Madrid” el 14 de xineru de 1934 y tituláu “El final del navío San Telmo”. La so memoria foi esleiendo col tiempu, hasta que, ente 1993 y 1995, l'arqueólogu Manuel Martín Bueno con un equipu d'arqueólogos como él, pero tamién de xeólogos y marinos de l'Armada, con representación española y chilena, realizó delles campañes d'investigación na zona onde'l “San Telmo” pudo naufragar. Rexistraron anomalíes magnétiques, que podríen corresponder con cañones y ancles somorguiaes y en tierra atoparon dellos oxetos como restos de madera y calzáu. Anque nun hai prebes de que nengún d'ellos perteneciera al “San Telmo”, Alicia Vallina afirma que nellos se quixeron ver nicios de qu'el navíu “pudo llegar a la mariña del continente xeláu”, lo que significaría que los marinos españoles que viaxaben nél fueron los primeros en triyar la Antártida.
Sobre aquel barcu perdíu en medio del xelu, comenta la historiadora asturiana, construyóse “un mitu”, popular ente los sieglos XIX y XX, que Galisteo y Vallina rescataron y narraron, dándo-y forma de cómic.
L'álbum “San Telmo”, el númberu 30 de la colección “Historia de España en viñetas”, pretendi ser tamién, según los sos editores, “un emotivu homenaxe a los homes que finaron nún de los naufraxos más emblemáticos de la hestoria de la nuesa Real Armada”.
Fai un par d'años, en mayu de 2019, el Muséu Naval de San Fernando, en Cádiz, entamó una esposición pol bicentenariu de la desapaición na Antártida del “San Telmo”.
