La emotiva carta d'amor d'un presu de la guerra enantes de que lu fusilaren: "Feli, siento hacerte sufrir tanto, mi compañera"

Esta ye una hestoria de resistencia: la de Felipa del Río, que quedó vilba a los venti años y con dos fíos por criar. Y tamién, y sobre toles coses, ye una hestoria d'amor. La de dos rapazos a los que dixebró pa siempres un pelotón de fusilamientu. Él dedicó-y les sos últimes lletres dende la cárcel, nuna carta qu'agora recupera LA NUEVA ESPAÑA: “Feli, si encuentras un hombre que te guste puedes casarte con autorización mía. Para mí, lo único que te pido es respeto para mi recuerdo”. 

Aquel 1 de mayu de 1934 llovía a barcalaos. Pero Felipa del Río, dicen los que la conocieron, nunca perdía la sorrisa. Caminaba airosa a la cabeza de la columna que baxaba d'Uxo, con una flor prendida en pechu. Tenía 17 años, la postrera de seis hermanos nacíos en Villagómez La Nueva (Valladolid). La familia treslladárase a la contorna del Caudal buscando un porvenir meyor na mina. 

Frente a la Casa del Pueblu, taba Narciso Gil. Fíu de lleoneses, entós trabayaba na mina. Na manifestación xuntáronse socialistes con comunistes, entós en pie de guerra. Pero qué más-y dará eso al amor. “Felipa y Narciso atoparon aquel día, na redolada de la Casa del Pueblu y nun se volvieron separar”, esplica l'historiador Ernesto Burgos, collaborador d'esti diariu. 

Vivieron l'amor como se bebe un café bono. A tragos llargos, ensin dexar qu'esfreza. En 1936, yá taben casaos y con dos fíos. Pero otra vegada'l destín, esta vegada pa mal: xusto'l día nel que Narciso empezaba a trabayar na Fábrica de Mieres, españó la Guerra Civil. Él incorporóse a un batallón de Cualloto, onde llogró'l grau de teniente. A ella, aquella pequena casa de Mieres fíxose-y inmensa. 

Esperaba tolos díes noticies. De Narciso o de la Guerra. Y, cuando cayó Asturies, a él detuviéronlu y lleváronlu a la cárcel d'Uviéu. Tuvo en prisión poco más de dos meses, antes del so “xuiciu farsa”. Cuando supo que diba morrer, atopó la forma de dici-y adiós a Felipa: “Tenía prohibío tener lápiz o bolígrafu, pudo escribir gracies a un espetu y con tinta artesanal, usando papel de liar”, esplica Ernesto Burgos. 

Que la carta llegara a les trémboles manes de la moza viuda, foi un xestu atentu ente tantu dolor. Daquién escondió aquel papel de liar ente la ropa puerco que diba recoyer la familia. A esti escritu, dicen, Felipa garróse tola vida: 

“Para Feli. Querida compañera: mis últimas letras quiero que te sirvan de consuelo, con esta intención las escribo, pues si fuera otro el resultado nunca lo haría. Serenidad y calma, querida compañera. Espero no tardarás en ver el triunfo de la causa por la cual doy la vida contento; no es de esta forma como yo la quisiera perder, pero, después de todo, muero cara al enemigo, indefenso, sí, pero altivo y orgulloso.

Mi muerte no es a causa de una u otra acusación, el motivo es que soy antifascista y enemigo de ellos (…) Feli, si encuentras un hombre que te guste puedes casarte con autorización mía. Para mí lo único que te pido es respeto para mi recuerdo. Por mal que te encuentres nunca vendas tu cuerpo, pues por mucho que sufras, más sufrirás después (…) Te besa y abraza tu compañero que siente mucho hacerte sufrir tanto”. 

Una carta desconocida hasta l'añu 2011. Foi entós cuando'l so nietu, Tony Fernández Gil, la incluyó como homenaxe nel llibru “La sombra del silencio es alargada”. La vida de Felipa del Río siguió, tres el fallecimientu de Narciso, con fuerza. Foi una muyer comprometida, entera pesie a los golpes que-y dio la vida. Yá nos años 70, impulsó y participó n'actividaes de l'Asociación de Familiares y Amigos de la Fosa Común de Uviéu. Tamién na entidá Viudes de la República “Rosario Acuña”. Participó nel documental “21x12”, de la Fundación Trece Rosas. 

Yera una muyer valiente. Poco primero de morrer, en 2013, pidió que depositaren les sos cenices na fosa común d'Uviéu. Nun podía ser d'otra manera, porque ellí descansa tamién la otra parte de so alma: Narciso Gil.