En tiempos de covid, deporte al aire llibre y pa tou tipo de persones. Con esa filosofía, y cola salú por bandera, los responsables del Club Triatlón Uviéu sacaron a la cai'l so programa “Scatenato”, un sistema d'entrenamientu que puede realizase en cualquier parque o rincón d'Uviéu y qu'esti día estrenóse en La Corredoria. “Empecemos equí, na Plaza de la Enseñanza, pero mañana podríamos treslladanos al Campu San Francisco. Lo que buscamos ye ameyorar la vida cotidiana de les persones con rutines que nun precisen aparatos”, esplica Jesús Valles, el presidente del club organizador y el principal impulsor de la iniciativa.
El Club Triatlón Uviéu llevaba ocho años ufiertando ximnasia de caltenimientu nel centru social del Cortijo y nel colexu Corredoria I. Empezaron con exercicios funcionales de la que se ponía de moda'l “crossfit”, pero llueu moldiaron les clases en función del perfil de los usuarios. “Vimos que la mayoría yeren muyeres d'ente 30 y 40 años que queríen afayase físicamente y baxar de pesu, pero con too y con ello buscamos un métodu que pudiera sirvir pa tol mundu, dende una persona que nunca fixo deporte hasta un atleta esperimentáu. Asina nació'l ‘Scatenato’”, señala Valles. “Teníamos trés grupos con cincuenta persones y trés díes de clase a la selmana, pero llegó'l confinamientu y aparó too”, añede'l presidente del club.
Agora, volvieron con fuerza. “La xente tenía necesidá de siguir faciendo deporte y a les dos selmanes de tar en casa empezamos a dar clases online y a magales en Youtube. Tuvieron ésitu enforma y eso foi lo que de verdá nos motivó a tomanos les coses más en serio”, diz Jesús Valles. Y ficiéronlo. “Desenvolvemos una aplicación pal móvil que cunta con más de cien entrenamientos prediseñados en función de los oxetivos de cada persona. Tien más de 4.000 exercicios distintos que tán pensaos pa trabayar en casa o en cualquier espaciu públicu ensin nengún tipu d'aparatu. Son programes que sirven p'ameyorar la vida cotidiana d'una persona qu'hasta entós yera sedentaria o p'avanzar na actividá deportiva de daquién que yá facía dalgún tipu de disciplina”, añede'l presidente del Club Triatlón Uviéu. “Scatenato” tamién-yos da a los usuarios la posibilidá de tener un tratamientu individualizáu a un preciu que nun supera los venti euros al mes. “Nel equipu cuntamos amás con nutricionistas, psicólogos y con dos instructores. Queremos que la xente ruempa cola so vida anterior y faiga deporte”, esplica Jesús Valles.
Un exemplu d'esi cambiu ye Fani Sánchez, una de les instructores. Tien mielofibrosis irreversible –un cáncer de médula ósea– y va diez años nun-y daben más d'una década de vida. “Empecé cola cuenta de facer una flexón completa y correr 400 metros ensin aparar y agora faigo triatlón. Cada vez que voi al médicu dícenme que toi perfecta. El deporte ye salú y el ‘Scatenato’, vida. Al mí diba acabáseme esti añu, pero equí toi”, sonri. María López, pela so parte, tien 33 años y acaba de xuntase al grupu. Nunca fixera deporte. “Facíame falta física y psicolóxicamente. Xubo unes escaleres y canso. Eso púnxome n'alerta”, afirma.
Cristina Allende y Vanesa Pérez tamién formen parte del programa, al que puede apuntase cualesquier al traviés de la web del Club Triatlón Uviéu. “Hai una atención individualizada a un preciu de risa. Pero yá nun ye'l dineru, que tamién importa, trátase de curiar la salú y d'esfrutar con un sistema d'entrenamientu bien bonu y entreteníu”, diz Allende.
