Desenvolver l'escáner de los aeropuertos a tamañu mini y a partir d'un teléfonu móvil. Eso ye lo que consiguieron facer investigadores del grupu de Teoría de la Señal y Comunicación de la Universidá d'Uviéu, que yá preparen el saltu comercial del so prototipu. L'afayu va dexar que “cualquier persona tenga accesu a un escáner d'ondes milimétriques” y pueda ver al traviés de los oxetos. Por exemplu, al traviés de les teles, del papel, del cartón, de materiales con baxu mugor... Les aplicaciones qu'abren estos miniescáneres son múltiples, según resalta'l profesor ya investigador de la Escuela Politécnica d'Inxeniería de Xixón Jaime Laviada. “Dende ver al traviés de la ropa, como faen los sistemes de seguridá de los aeropuertos, hasta detectar defectos ocultos nes construcciones, como escomios. Ye lo que llamamos evaluación non destructiva: inspeccionamos daqué ensin baltalo”, esplica.
Tou entamó con un proyectu p'ayudar a los ciegos, denomináu “Tecnologías avanzadas en ondas milimétricas para dispositivos vestibles o de mano”. “Unu de los oxetivos d'esi plan yera diseñar un radar integráu na ropa, una especie de cayáu electrónicu, que pudiera usase por persones con discapacidá visual pa detectar y recatiar torgues”, comenta Jaime Laviada. Pero esi cayáu intelixente foi “evolucionando” hasta derivar nun escáner de bolsu con idéntiques resultancies a los de gran tamañu que funcionen nos aeropuertos de tou'l mundu y son muncho más caros.
La clave del so desenvolvimientu foi l'usu de teléfonos móviles d'última xeneración. Y en concretu de dos de les sos partes: les cámares, pa siguir la posición del smartphone, y los radares, que dexen tresmitir y recibir señales electromagnétiques. “Pa llograr la imaxe, utilizamos les cámares del móvil y movemos el teléfonu delantre de la zona que queremos escaniar en zigzag y, amás, emplegamos el radar o'l mesmu sistema de comunicación del teléfonu pa tresmitir y recibir ondes. Gracies a esta combinación llogremos imaxes tremendamente nidies”, afirma Jaime Laviada.
Hasta apocayá, cunta l'investigador, los teléfonos móviles nun teníen un radar incorporáu, polo qu'esta meyora tecnolóxica xugó un papel fundamental nel diseñu de los miniescáneres. Anguaño dellos dispositivos Google lleven incorporaos radares pa detectar xestos como'l que se fai al pasar páxines. Otra tecnoloxía móvil sobre la que se sofitaron los investigadores asturianos ye'l 5G, qu'emite ondes milimétriques bien curties que dexen consiguir imaxes d'altu resolvimientu. “Con esta medría na frecuencia ganamos en resolvimientu y lo qu'enantes yera una simple mancha agora ye una imaxe bien clara. Llogremos imaxes bien nidies de tisories, llaves...”, añede.
Xunto a Laviada, nel proyectu participaron Fernando Las Heras, catedráticu de la área de Teoría de la Señal y les Comunicaciones, y Guillermo Álvarez, investigador postdoctoral. “Una de les aplicaciones inmediates del prototipu ye la seguridá”, detalla Álvarez. Por casu, sigue, “nos aeropuertos tamos avezaos a ver escáneres pergrandes; col nuesu diseñu podríemos tener un escáner portátil, bien pequenu, que podría usar cualesquier cola mano y ensin nengún tipu d'entrenamientu”. Pero hai más. “Otru tipu d'aplicaciones podría ser nel sector de la construcción pa detectar tuberíes ocultes o tamién pa comprobar l'estáu de los edificios; por exemplu, si presenten dalgún tipu d'escomiu”, amiesta. El prototipu podría utilizase, inclusive, pa detectar partícules estrañes nos alimentos.
Los creadores del miniescáner yá tán en conversaciones con fabricantes de móviles pa llevalu al mercáu y facer un diseñu más maduru, nel qu'el mesmu escáner tea integráu nel móvil. L'actual ye un dispositivu compuestu por pieces sueltes del smartphone (el radar y la cámara).
