“Un café con lleche, por favor”. Un home de pelo canoxu, gafes y mediana estatura entró nun pequenu chigre de la cai San Melchor García Sampedro, n'Oteru (Uviéu), el 17 xunetu del añu pasáu pa da-y una sorpresa al dueñu. Ente'l mázcaru, la ropa corriente y lo estándar de la so consumición, pasó desapercibíu nun primer momentu. Sicasí, cuando l'hosteleru-y llevó la taza a la mesa y lu miró a los güeyos, diose cuenta de que lu conocía. Llevaben ventiséis años ensin vese. El veceru yera'l Padre Ángel y el dueñu del establecimientu, Miguel Tejedor, ún de los miles de neños que pasaron pelos llares d'acoyida de “Mensajeros de la Paz”.
El sacerdote mierense Ángel García Rodríguez, conocíu como'l Padre Ángel, decidió visitar a Miguel en recibiendo la llamada d'una amiga y vecera d'esi chigre -“La Penela”- na que-y dicía qu'unu de los sos mozos yera una de les persones más queríes del barriu d'Oteru y amás dueñu d'un chigre. El Padre Ángel pasaba entós unos díes n'Asturies. Agradeció a la Santina, a les ONGs asturianes; a Protección Civil; a los cuerpos de seguridá; al presidente asturianu, Adrián Barbón; a la delegada del Gobiernu, Delia Losa; y a los alcaldes d'Uviéu y Mieres, Alfredo Canteli y Aníbal Vázquez, l'ayuda y el trabayu realizáu "pa salvar vides" mientres la primer fola de la pandemia.
“Diome una sorpresa terrible. La última vegada que lu vi foi en 1994, cuando a ‘Mensajeros de la Paz-y diéron el Premiu Príncipe d'Asturies de la Concordia. Yo, qu'entós tenía 19 años, allegué en representación de l'asociación a ún de los actos previos a la ceremonia. Foi na Fundación Llaboral de la Construcción, n'El Caleyu”, esplica a LA NUEVA ESPAÑA l'hosteleru, que colgó un colax nuna de les parés coles semeyes de la inesperada visita del Padre Ángel al so local.
Tejedor entró con 12 años nun centru d'acoyida de menores en Zamora. Tuvo dos años y depués pasó, na mesma localidá, a otru rexentáu pola asociación fundada pol Padre Ángel. Más tarde, con 17, marchó pa Uviéu a un pisu tuteláu de l'asociación hasta que con 21 fíxose independiente. Prefier nun entrar en detalles sobre les circunstancies que fixeron que Protección de Menores interviniera y lu dixebrara de sos padres. “Asuntos familiares”, diz namás.
De la so estancia pelos llares de “Mensajeros de la Paz” guarda una bona alcordanza y amistaes pa tola vida. Ún de los educadores que tuvo n'Uviéu ye'l padrín de la so fía y otros son veceros habituales. “Llevo trabayando dende los 19 años. Cuando taba nel pisu tuteláu, el 40% del mio sueldu yera pa mi y l'otru 60 apurríalu na oficina de ‘La Cruz de los Ánxeles’ (la primer asociación fundada pol Padre Ángel). Cuando colé a vivir solu diéronme una cartiya con esi dineru aforrao: 300.000 pesetes. Una pasada”, rellata.
Texedor rexenta'l chigre “La Penela” fai 18 años, pero trabaya na redolada dende fai más, siempre n'hostelería. Tien pareya y una fía y trabaya él namás nel establecimientu. “Voi tirando, que tal que tán los tiempos yá ye abondo”, comenta. Avezáu a lluchar, aprovecha la ocasión pa llamar l'atención sobre los rapazos que viven en riesgu d'esclusión: “Hai munches families pasándolo mal equí mesmu. Guah.es con unos problemes y unes faltes terribles a los qu'hai qu'ayudar. Detrás del comportamientu d'un mozu adolescente suel haber traumas y vivencies bien dures. Eso pása-yos a los d'equí y a los que vienen de fora. Tolos mozos en situación d'esclusión social merecen respetu, comprensión y ayuda”. Pa Tejedor, el llabor de los educadores de los llares de menores y pisos d'acoyida ta poco reconocida: “Yo mesmu nun valdría, hai que saber empatizar y reconducir comportamientos”.
La visita del Padre Ángel fixo que dambos recuperaren el contactu. El sacerdote unvió-y una carta de felicitación pol so negociu na que-y dicía “que taba arguyosu y lo muncho que-y prestara veme”.
Agora, el chigre lluz les semeyes del fundador de “Mensajeros de la Paz” y una pequena escultura de l'asociación cola filosofía del Padre Ángel como lema: “Namás delantre Dios, un neñu, un vieyu y una persona ensin llar, tenemos de ponenos de rodíes”.
