“Nun quiero sentimentalismos nin falar d'hestories de superación. Solo soi un profesor más”. Sebas Sierra niégase a que la so discapacidá lu defina. Esti uvieín convirtióse en 2016 na primer persona ciega de nacencia que llogró sacar una plaza de profesor de secundaria per oposición. En velando les sos primeres armes como docente en Llanes, Sierra marchó pal institutu de La Corredoria, onde atopó una comunidá educativa na que s'integró por completo. “Siéntome bien sofitáu por toos, profesores y alumnos. Trátenme perbién”, asegura. 

Pese al movimientu de persones qu'hai nel estragal del sobresaturáu institutu de La Corredoria (Alumnos: 952; capacidá: 600), Sebas Sierra muévese con una naturalidá y una seguridá inesperaes. Empobináu por “Ilux”, un animal formáu nel programa de perros guía de la ONCE, Sebas Sierra avanza ensin percances, recatiando les escases torgues que s'atopa con facilidá. “Ye muncho meyor andar con perru, y muncho más cómodo, que tar dando muletazos perhí”, comenta Sierra, con sorna.

Sebas Sierra, con "ilux", nel estragal del IES La Corredoria. Luisma Murias

Avanza escontra l'aula de los sos alumnos de Bachiller, a los que tien qu'impartir clase d'Hestoria d'España. Tán nel pisu inferior, pero a Sebas Sierra nun-y esmuel tener que baxar pela escalera de doble tiru que xune dambos pisos. “Les escaleres pásoles yo...”, rise, mientres baxa con remangu, con “Ilux” sollerte a la cadencia de los sos pasos, amatagando'l so ímpetu natural pa nun provocar un tropezón. 

L'aula ta atarraquinada d'alumnos, que barbuxen ensin aparar hasta que ven entrar a Sebas y a “Ilux” pela puerta. El perru ximielga la cola y mira a los rapazos con güeyos morridosos. Dende les primeres files escúchase: “¡Qué cuqui!”. Pero Sebas Sierra nun dexa muncho marxe pa la contemplación y empieza a preguntar pola llección del día. Tán cola Guerra Civil. Na víespora, trabayaron la dimensión internacional del conflictu, aquello qu'Enrique Moradiellos radiografió en “El reñidero de Europa”, y pa esi día anden revisando les fases de la guerra.

Sebas Sierra, nuna clase nel IES La Corredoria. Luisma Murias

Namás empezar la clase percíbese bien nidio cómo llogra Sebas Sierra caltener el control de la llección ensin recurrir a sofitos visuales. Nun hai misteriu, solo muncho trabayu. El profesor describe con precisión qué tienen los alumnos enfrente, tien memorizáu'l conteníu de cada apartáu. Inclusive describe con precisión mapes y gráficos que punxo a disposición de los alumnos. Esta técnica yá-y sirvió pa superar la oposición a profesor, onde tenía munchos conteníos de Xeografía: “Tenía que memorizar los mapes, pa reconocelos pela descripción que me facíen”

Magar la so discapacidá, caltien en tou momentu'l control de la clase. “Dacuando, dalgún alumnu que nun te conoz te reta un pocu y llevántase o daqué. Pero cuando lu pilles, queden plasmaos”, diz Sierra, ente rises. Los alumnos dan fe d'esti “sestu sentíu” del so profesor: “Ye daqué estraño, dacuando tas un pocu despistada y dase cuenta y diztelo. Y ye como: ¿Qué? ¿Cómo se dio cuenta?”, esclama Lucía López.

“Ilux”.

“Ilux”. Luisma Murias

Mientres la clase, “Ilux” queda apegáu a la mesa del profesor, folgando hasta'l momentu en que Sebas lu pueda necesitar. Mira alternativamente a los alumnos y al profesor, y casi paez siguir la clase. Pero llueu abandona la esplicación y échase a apigazar hasta qu'acaba. Los alumnos, a estes altures, yá nin reparen nel can, centraos na esplicación de Sebas Sierra. “De primeres llamábanos l'atención, sobremanera porque nunca tuviéramos un perru en clase. Pero al poco avéceste. Ye un profe como los demás”, conclúi Paula Menéndez.