“Ente 1934 y 1936 perdiéronse 43 de les 66 obres d'arte depositaes pol Museo del Prado n'Uviéu y Xixón, casi dos terceres partes. Tamos falando d'una proporción enorme de perdes que constata'l calter destructivu tantu de la Revolución como de la Guerra Civil”. Con esti camientu abrió esti día Javier Barón Thaidigsmann, Xefe de Caltenimientu de Pintura del sieglu XIX del Museo Nacional del Prado, el seminariu “El arte mueble perdido en Asturias. De la Guerra de la Independencia a la Guerra Civil”, entamáu pol grupu d'investigación acreditáu “Ceán Bermúdez”, de la Universidá d'Uviéu, y que se desenvuelve de forma telemática. 

Javier Barón foi l'encargáu de la conferencia marco del seminariu: “Cuadros destruidos en los depósitos asturianos del Museo del Prado en 1934 y durante la Guerra Civil”. Una ponencia na que l'historiador del arte esbilló la naturaleza de les obres d'arte asitiaes pol Museo del Prado n'Asturies, los autores qu'había representaos, cómo y cuándo aportaron a la rexón y en qué circunstancies se produció el so desanicie. 

Según detalló Barón, el Museo del Prado empezó a depositar obres n'otres instituciones españoles en 1866. Los primeros depósitos n'Asturies son de 1877, cuando llegaron a Cuadonga una “Anunciación” de Vicente Carducho y una obra icónica como ye “D. Pelayo en Covadonga”, de Luis de Madrazo. Na década de 1930, en Cuadonga había depositaes 20 pintures del Museo del Prado, n'Uviéu otres 56 (más cuatro escultures), y en Xixón seis más. La nómina d'autores representaos incluyía a maestros como Zurbarán, Carducho, Luca Giordano (que tenía dos cuadros, dambos perdíos), Carlos de Haes o Emilio Sala, ente otros. Solo figuraba un pintor asturianu, pero con una obra mayúscula: José Uría y Uría y el so cuadru d'hestoria “El campo de San Francisco (Primer grito de la Independencia, 1808)”. 

De les sesenta obres curiaes n'Uviéu, ente 1934 y 1936 perdiéronse nada menos que 37. Solo na aciar xornada del 13 d'ochobre de 1934 desaniciáronse venticuatro cuadros que se curiaben na Universidá d'Uviéu, no que supón, en palabres de Barón, “la mayor perda habida nun depósitu del Prado”. Ente ellos taba'l monumental llenzu de José Uría y Uría, del que se caltienen delles semeyes. 

“El nivel de destrucción rexistráu n'Asturies nestos años foi peraltu”, concluyó Barón, que destacó que, siquier, tres la Guerra Civil nun se volvió perder nenguna otra obra del Prado na rexón, nin por destrucción nin por robu.