Asturies vivía nel pasáu mes d'abril de va 34 años una gran decepción en relación cola variante de Payares: el 30 d'abril de 1987 el Gobiernu de Felipe González aprobaba'l Plan del Tresporte Ferroviariu (PTF), nel que bona parte de la sociedá asturiana punxera les sos esperances pa llograr una nueva salida a la Meseta que sustituyera a la yá entós obsoleta rampla de Payares, construyida nel sieglu XIX. Aquel plan estatal incluyía toles grandes variantes previstes pa modernizar la rede ferroviaria española, sacante una: la de Payares. Y eso que yera la única de toes que yá cuntaba con un estudiu informativu.
Yera'l segundu desaire a Asturies, porque'l primeru llegara n'avientu de 1982, cuando'l nuevu gobiernu socialista, solo unos díes depués de tomar posesión, ordenaba paralizar la tramitación de la meyora del trazáu ferroviariu n'Asturies, al considerar que la inversión, cifrada entós en 38.400 millones de pesetes (más de 230 millones d'euros), nun se xustificaba “pol volume de tráficos esistente”.
La esclusión de la variante de Payares nel PTF, que provocó severes crítiques al PSOE n'Asturies, xustificóse por esa formación política colos mesmos argumentos que remanaría nos años siguientes al votar cinco vegaes en contra del proyectu y abstenese otres dos, n'Asturies y en Madrid. El resume d'aquellos razonamientos yera: “Nun ta esclariada dafechu la incógnita al respective de la urxencia de la so necesidá”, nin tampoco “la dificultá relativa a la so viabilidá técnica”. Unes considerancies que se repitiríen tamién pa escusar l'ausencia del proyectu nel Plan Director d'Infraestructures 1993-2007 (PDI), aprobáu'l 4 de marzu de 1994 pa sustituyir al PTF.
El PSOE votó en contra d'impulsar o incluyir la Variante nos planes estatales en cuatro ocasiones na Xunta Xeneral (26 de xunetu de 1988, 30 de payares de 1989, 2 d'avientu de 1993 y 26 de xineru de 1995) y nuna nel Congresu de los Diputaos (25 d'abril de 1991). Amás, abutúvose nuna ocasión na Cámara Baxa (8 d'abril de 1997) y n'otra nel Senáu (5 de payares de 1997).
Pero la cronoloxía de la Variante inclúi más asocedíos importantes n'abril. El primeru, en 1981, cuando l'entós presidente de Renfe, Alejandro Rebollo, de la Unión del Centru Democráticu (UCD) d'Adolfo Suárez, nel Gobiernu, encargó a Renfe la redacción d'un estudiu preliminar p'analizar la zona pela que se podría empobinar la Variante ente La Robla (Llión) y Mieres.
Renfe, cola ayuda de la Universidá d'Uviéu y d'una empresa privada, estudió una amplia área del Cordal Cantábricu pela que podría escurrir la futura salida ferroviaria. Fueron los primeros estudios xeolóxicos y xeotécnicos de la zona, que sirviríen de base pa los realizaos darréu.
Tamién n'abril, en 1991, el día 25, s'aldericó nel Congresu una resolución aprobada pola Xunta 18 meses enantes na que se reclamaba la inclusión de la Variante nel PTF. El resultáu foi de 84 votos a favor y 149 en contra, los del Grupu Socialista. Na Xunta asocediera esactamente lo mesmo: sofitu de PP, CDS ya IX, y refugu del PSOE.
Seis años más tarde, el 8 d'abril de 1997, nuevamente'l Congresu de los Diputaos celebró un alderique sobre la variante de Payares: la toma en consideración d'una proposición de llei d'IX pa incluyila nel PDI, previa a la tramitación lexislativa nes Cortes Xenerales. Foi aprobada cola astención del Grupu Socialista. Esti mesmu asuntu votóse en payares d'esi mesmu añu nel Senáu. Tamién s'aprobó nesa ocasión cola abstención de los representantes del PSOE.
El tiempu trescurríu desque en 1981 se realizaron los primeros estudios xeotécnicos del Cordal obligó al Gobiernu a encargar nuevos analises del terrén. Los trabayos empezaron n'abril d'esi añu y duraron trés años.
Anque nun primer momentu se planiara que l'alta velocidá llegara hasta Xixón y Avilés, el proyectu del trazáu ente La Pola L.lena y les trés principales ciudaes asturianes quedara orielláu pola enorme dificultá técnica qu'acarretaríen les obres. Sicasí, el 9 d'abril de 2015 el Ministeriu de Fomentu (agora de Tresportes) volvía a la carga y sometía a información pública l'estudiu informativu del tramu d'Uviéu a Xixón y Avilés de l'AVE a Asturies.
La última efeméride destacada nel mes d'abril asocedió va trés años, cuando Adif reveló n'esclusiva a LA NUEVA ESPAÑA'l costu actualizáu de la variante de Payares, 3.760 millones d'euros, esactamente lo mesmo que l'acelerador de partícules de Xinebra. Darréu, tres les siguientes axudicaciones, esa cifra foi revisada a l'alza, hasta asitiase nos actuales 3.845 millones d'euros. Tampoco ye nesti casu una cantidá definitiva, visto qu'entá queden obres por axudicar.
