Les plataformes audiovisuales de pagu empiecen a facer sitiu nos sos catálogos a la telerrealidá. Netflix ta a piques de dar el pasu, de la mano del productor asturianu José Velasco, fundador y presidente d'iZen, qu'anuncia un “formatu d'entretenimientu, con un conceutu nuevu que va revolucionar el sector”. Supón una evolución de la telerrealidá, tal que s'entendía hasta agora, siempres n'abierto. Netflix avanzó qu'esi novedosu espaciu va llamase “Insiders”, que se va facer un cásting virtual y que va haber un premiu pal ganador, de cien mil euros. “Insiders” ye namás ún de los proyectos que Velasco tien ente les manes nun momentu trascendental pa iZen, tres la incorporación al so accionariáu de la productora francesa Newen, que forma parte d'unu de los grandes grupos empresariales de Francia. La segunda temporada de “El Cid”, la serie que produz p'Amazon Prime, yá ta cerrada; tien en producción un thriller qu'anuncia que va ser “maraviyosu”, “Memento mori”, una adaptación d'una novela de César Pérez Gellida; adquirió los derechos de “La Ciudad de los Prodigios”, d'Eduardo Mendoza, y sigue trabayando pa televisiones autonómiques y nacionales. Nel Reinu Uníu, onde iZen cuenta con trés productores, tien entamaes delles series y documentales. Y tou ello a pesar de les restricciones pol covid, que, ente otres coses, enzanquen les grabaciones y los rodaxes.
La francesa Newen, que sustitúi a Vocento como sociu mayoritariu na xunta d'accionistes d'iZen, ye, según Velasco, “un bon sociu pa crecer”. De cara al futuru, nun pierde de vista'l mercáu llatinoamericanu, inclusive'l portugués. Velasco, fundador de productores históriques nel mercáu audiovisual español como Globomedia o Zeppelin TV, revela que l'acercamientu ente iZen y Newen data de va dos años. “La empresa francesa tien esi aire familiar, poco especulativu, ye un grupu de los d'enantes, con un accionariáu estable”, cuenta, y esi modelu de negociu atraíalos. Los franceses taben interesaos poles sos inversiones n'Inglaterra y Escocia.
“Tamos nun momentu de munchu cambéu, con grandes movimientos d'afitamientu nel audiovisual. Les compañíes franceses fueron bien dinámiques, tienen un ámbitu regulatoriu más ampliu que l'español y protección frente a les compañíes americanes, daqué que falta n'España”, comenta. La forma de consumir conteníos audiovisuales ta tresformándose. El cambéu empezara enantes de la crisis sociosanitaria pero con ella afitóse. “La pandemia multiplicó'l consumu de la televisión, foi un catalizador d'unos cambeos que se víen venir y que nunos meses esplotaron”, indica. Nel gran mercáu audiovisual, esplica, conviven empreses como Netflix, qu'empezó siendo un videoclub, distribuidores como Disney o HBO y plataformes comerciales como Amazon, toes atraíes poles posibilidaes d'un nuevu modelu de negociu audiovisual.
“La xente sigue viendo cuatro hores de televisión al día, non en directu, pero acaldía un capitulín d'una serie. La tele dexó de ser una esperiencia de rellenu d'hores pa ser más proactiva, y de más nivel”, repara. “Esto ye imparable, y la xente tien que consumir ónde quiera y cuando quiera”, afirma, na so casa o nel cine.
“España, dende'l puntu de vista creativu y de xeneración de conteníos d'ésitu ta nel top trés mundial, detrás d'Estaos Xuníos ya Inglaterra, y nun tiempu percurtiu. Munches series españoles son fitos n'otros países que nun tienen l'español como llingua vehicular”, afirma. “Tendría d'haber más productores nacionales con proyección internacional, esa falta ye bien grave”, alvierte. “Falta visión política y económica. Tamos xugando al recate curtiu cuando lo que tenemos ente manes ye'l futuru de la industria cultural. Eso ye importante non solo pa nós sinón tamién pa les futures xeneraciones”, alvierte.
“Asturies tien una gran oportunidá”, afirma, con un paisaxe envidiable y equipamientos. Cunta que los executivos de Newen, a los que José Velasco convidó a Asturies, quedaron plasmaos poles posibilidaes de la rexón, que ta a menos de dos hores de París n'avión. “Animo al Executivu asturianu a qu'emburrie esti sector”, añedió, y a qu'aproveche los fondos europeos pa ello. “Hai muncho talentu asturianu que ta deseyando volver a la so tierra”, asegura.
