Anne Applebaum, premiu “Pulitzer” y una de les primeres intelectuales qu'alvirtió de los peligrosos enclinos antidemocráticos n'Occidente, ufierta en “L'atapecer de la democracia (La seducción del autoritarismu)” un manual sobre les trampes del nacionalismu y de l'autocracia. ¿Por qué los sistemes con mensaxes simples y radicales son tan atractivos? Lo que sigue ye una selección de reflexones tan esmolecedores como reveladores, sobremanera nel campu virtual. Un aperitivu: “Daes les condiciones amañoses, cualquier sociedá puede ponese de costazos a la democracia. Ello ye, que si nos tenemos qu'empobinar pola hestoria, a la llarga toles nueses sociedaes van facelo”. 

Los teóricos, apunta l'autora, suelen omitir un elementu “crucial nel cayente de la democracia y la forxa de l'autocracia. La mera esistencia de persones qu'almiren a los demagogos o se sienten más cómodes en dictadures nun esplica del tou por qué estos ganen elecciones. El dictador quier gobernar, pero ¿cómo llega a aquella parte de la ciudadanía que siente lo mesmo? El políticu antilliberal quier escazar los tribunales pa dotase de más poder, pero ¿cómo enguada a los votantes por qu'acepten esos cambeos?”. 

En munches democracies avanzaes güei nun esiste un alderique común, apunta l'autora, “muncho menos un relatu común. La xente siempre tuvo opiniones distintes, pero agora parte de datos fácticos distintos. Coles mesmes, nun ámbitu informativu ayenu d'autoridaes reguladores –polítiques, culturales o morales– y faltu de fontes fiables, nun hai un xeitu fácil d'estremar ente les teoríes conspiranoiques y les hestories reales. Güei arrobínense relatos falsos, tendenciosos y davezu deliberadamente engañosos que formen auténtiques quemes dixitales fora de control, desboyos de falsedaes que s'esparden con demasiada rapidez pa ser oxetu d'una mínima verificación factual”.

Y anque dicha verificación llegue a realizase, “aquel día yá nun importa: parte de la opinión pública nunca visita los sitios web dedicaos a la verificación de datos, y si lo faen, tampoco nun cree lo que dicen (...). El problema nun ye una mera cuestión d'hestories falses, datos incorrectos o inclusive campañes electorales y asesores de comunicación política que xueguen puerco: los mesmos algoritmos de les redes sociales afalen les falses percepciones del mundu. La xente clica solo nes noticies que-y presta conocer, y depués Facebook, YouTube y Google amuésen-yos entá más de cualesquier que sían les sos preferencies previes, yá se trate d'una determinada marca de xabón o d'una determinada forma de política. Los algoritmos tamién radicalicen a los que los usen. Si daquién clica en canales antiinmigración de Youtube lexítimos, por exemplu, estos pueden llevalu rápido, con solo unos pocos clics más, a sitios que fomenten el supremacismu blancu y depués a sitios qu'afalen la xenofobia violenta”. 

Amás, indica, “visto que se diseñaron pa maximizar el tiempu qu'ún aguanta en llínea, los algoritmos tamién favorecen les emociones, especialmente la roxura y el mieu. Y visto qu'estos sitios son adictivos, afecten a les persones de xeitos inesperaes. La roxura conviértese nun vezu. La disensión pasa a ser normal. Anque polo xeneral les redes sociales inda nun constitúin la principal fonte d'información pal conxuntu de la población, yá tán contribuyendo a configurar la manera en que los políticos y los periodistes interpreten y describen el mundu”.

La polarización “pasó del mundu dixital al real. La resultancia ye un ‘hiperpartidismu’ que fai medrar la rocea al respective de la política ‘normal’, los políticos del establishment, los risibles ‘espertos’ y les instituciones ‘convencionales’, incluyíos los tribunales, la Policía y l'Alministración pública, lo que nun resulta nada estraño, pos na midida na qu'aumenta la polarización, invariablemente retrátase a los emplegaos del Estáu como si cayeren ‘víctimes’ de los sos oponentes”. 

Nun ye casual que tanto'l partíu Llei y Xusticia en Polonia como los partidarios del brexit en Gran Bretaña y l'Alministración Trump n'Estaos Xuníos “solmenaren ataques verbales contra funcionarios y diplomáticos de carrera; como tampoco lo ye que güei los xueces y tribunales sían oxetu de crítica, escrutiniu y roxura tamién en munchos otros llugares. Nun mundu polarizáu nun puede haber neutralidá porque tampoco puede haber instituciones apolítiques o non partidistes”.

El mediu del alderique tamién camudó la so naturaleza, según la ensayista: “A los nuesos teléfonos o ordenadores llega un constante fluxu d'anuncios de secadores de pelo, noticies sobre estrelles del pop, histories sobre'l mercáu de bonos, notes de los nuesos amigos y memes d'estrema derecha, caún d'ellos aparentemente col mesmu pesu ya importancia. Si nel pasáu la mayoría de les conversaciones sobre política teníen llugar nuna cámara lexislativa, les columnes d'un periódicu, un estudiu de televisión o un chigre, güei suelen producise en llínea, nuna realidá virtual onde llectores y escritores siéntense separtaos unos d'otros y de los problemes a los qu'aluden; onde toos pueden ser anónimos y naide tien que responsabilizase de lo que diz. Reddit, Twitter y Facebook convirtiéronse nel mediu perfectu pa la ironía, la parodia y los memes cínicos: la xente ábrelos pa restolar pela pantalla y pasar un ratiquín”. 

Nun ye d'estrañar, entós, “que de sópitu haya toa una plétora de candidatos políticos ‘irónicos’, ‘paródicos’ y ‘chistosos’ que ganen les elecciones en países tan desemeyaos como Islandia, Italia y Serbia. Dalgunos son inofensivos; otros non. Anguaño toa una xeneración de mozos trata les elecciones como una oportunidá p'amosar el so desdexu pola democracia votando por persones que nin siquier finxen tener opiniones polítiques”. 

Acabemos con Donald Trump: apurre nuevos elementos de collecha propia a un vieyu discursu. Esto ye: “Al milenarismu de la estrema derecha y el nihilismu revolucionariu de la estrema esquierda, él añede'l fondu cinismu del ue lleva años xestionando planes comerciales de duldosa naturaleza en tol mundu. Trump nun conoz la hestoria d'Estaos Xuníos, poro, nun puede tener nenguna fe nella. Nun entiende'l llinguaxe de los fundadores de la nación nin simpatiza con él, de manera que tampoco puede sirvi-y d'inspiración. Visto que nun cree que la democracia estadounidense sía bona, tampoco-y interesa qu'Estaos Xuníos aspire a ser un modelu ente les naciones”.