El ministru de Presidencia del Gobiernu, Félix Bolaños, aseguró'l pasáu vienres que la llei del audiovisual nueva que preparen va garantizar la protección del catalán y del restu de llingües cooficiales n'España, pero nun concretó si va ser al traviés d'un porcentaxe o al traviés d'otru mecanismu.

Nuna entrevista en Catalunya Ràdio recoyida por Europa Press, esplicó que tán trabayando pa concluyir el testu, pero evitó dicir si van establecer porcentaxes o cuotes pa la producción audiovisual en catalán.

"Un porcentaxe ye la manera más cenciella, más intuitiva, pero lo importante ye garantizar y cuntar col alcuerdu de tolos actores pa priorizar que les llingües cooficiales tean nesa llei. Van tar nesta llei", dixo.

Y ye que, según Bolaños, hai que defender les llingües cooficiales n'España porque, al so xuiciu, son parte de la riqueza cultural del país, y por eso insistió en que les llingües cooficiales van tener garantizáu "un nivel de producción y grabación que va ser respetuosu", segun informa EUROPA PRESS.