Taba que nun lo creía. “Nun lo puedo nin describir”. Fueron les primeres palabres de Gazir en faciéndose col tronu nacional del “freestyle”. Convirtióse nel nuevu campeón nacional de Red Bull España dempués de vencer a Sweet Pain na final nun atarraquitáu WiZink Center en Madrid. L'uvieín, afincáu en Muros de Nalón, cumplió los pronósticos y proclamóse campeón de la Final Nacional de Red Bull España superando a Míster Ego, BTA, Tirpa y al mentáu Sweet Pain.
“Fui de menos a más”, reconoció Gazir, qu'en realidá se llama Gabriel Sánchez y ye estudiante de Física na Universidá d'Uviéu. El “gallu” asturianu esplicó que de primeres, na competición de la nueche del pasáu vienres “nun tenía del tou'l día”. Eso sí, cuando llegó a la final “fixi la mio meyor ronda, afayéme percómodu dende'l principiu y alcontrábame mui fuerte”.
Gazir, que fai menos d'un mes yá s'alzó cola corona mundial de Freestyle Másters Series (FMS) Internacional, revalidó la so condición de campeón como meyor improvisador d'España en “la madre de toles batalles”. Asina, él va ser el representante español na Final Internacional que se va celebrar en Santiago de Chile, onde va acompañar al vixente subcampeón Skone. Enagora, el mesmu domingu viaxó a México.
Dempués de facese col trunfu na final nacional énte miles de persones, y con munchos miles más siguiendo la retresmisión per internet, Gazir allegó a la entrevista protocolaria de los campeones lluciendo una bandera d'Asturies, amás de la enorme medaya que lu acredita como'l meyor improvisador d'España.
