Una muyer atada a una columna. Del so banduyu broten cuatro roses ensangrentaes. El cuadru titúlase "Las rosas sangrantes” y pintólu Salvador Dalí en 1930. Nel surrealismu tou se desdibuxa y flota na frontera del suañu, pero ye probable que nesti llenzu de 61x 50 centímetros Dalí tea falándonos de los sos problemes pa tener fíos con Gala. El cuadru, que'l so significáu descodificó esti día Alfonso Palacio, director del Muséu de Belles d'Asturies, ye la imaxe de la esposición “50 obres maestres de la Colección Abanca”, que s'abrió al públicu el xueves pasáu a les 19 hores. Una esposición de rellumón pa entamar el programa de seronda na pinacoteca asturiana pos al pie de Dalí cuelguen otres d'otros artistes de talla internacional como Picasso, Klee, Kandinsky, Juan Gris, Tàpies, Barceló o Chillida. Toos xuntos y na planta -1 del Edificiu Ampliación “cuentennos la hestoria del arte del sieglu XX”, resumió Palacio na presentación de l'amuesa. 

La esposición va tar abierta al públicu hasta'l próximu 16 de xineru de 2022. Ye una magnífica oportunidá pa repasar l'arte del sieglu pasáu con especial atención a tres vanguardies artístiques: el cubismu, l'arte astracto y el surrealismu. De caúna d'elles hai pieces representatives nuna amuesa que se nutre de los fondos d'Abanca, la entidá financiera gallega que tien “la mayor colección d'arte de Galicia y una de los meyores de toa España”, detalló Alfonso Palacio na presentación. Nel actu tuvo acompañáu pola conseyera de Cultura, Berta Piñán, y el conceyal de Cultura del Conceyu d'Uviéu, José Luis Costillas. Per parte de la entidá financiera asistieron, ente otros, Diego Gascón, el responsable de xestión artística de la colección Abanca y cocomisariu de l'amuesa xunto con Palacio, y Miguel Ángel Escotet, director xeneral de responsabilidá social y comunicación de la entidá gallega. 

Escotet, asturianu de nacencia, recordó la so infancia ente Nava y Xixón y sorrayó la vocación de la entidá financiera de “formar parte activa d'aquellos llugares onde desenvolvemos la nuesa actividá”. Detalló la magnitú de la colección Abanca, compuesta por más de 1.300 obres de dos centenares d'artistes. Nació alredor d'un “sólidu núcleu” d'artistes gallegos y, darréu, incorporó otres grandes firmes nacionales ya internacionales, hasta conformar “un conxuntu esquisitu d'interés estéticu y creativu”. Escotet incidió en que “esti patrimoniu pierde'l so sentíu si nun ye conocíu y disfrutáu pola sociedá”. La conseyera de Cultura, Berta Piñán, destacó la calidá de la esposición, “que naide tendría de perdese”, y emponderó la xestión del Muséu de Belles Artes d'Asturies que lu convirtió “nún de los principales museos d'España” magar tar “na periferia del Estáu”. Piñán tamién recordó la inversión estatal de 6 millones d'euros que va dexar completar la segunda fase de l'ampliación de la pinacoteca asturiana. 

El cubismu, l'astracción y el surrealismu conformen el puntu de partida de la esposición. Asina, na sala d'esposiciones temporales van poder vese delles obres de Pablo Picasso, Georges Braque, Wassily Kandinsky, Paul Klee, Max Ernst y Salvador Dalí. Al par d'ellos, apaecen otros creadores españoles claves na obra del sieglu XX como Juan Gris, María Blanchard, Maruja Mallo o Joan Miró. 

Tres ellos, el focu de la esposición pasa a asitiase nos grandes nomes del arte español del pasáu sieglu, dende Manolo Millares o Antonio Saura, fundadores del grupu El Pasu, a Jorge Oteiza, Antoni Tàpies o Eduardo Chillida. El percorríu espositivu tamién pasa per una representación del panorama de les décades 70 y 80 con obres de Darío Villalba, Equipu Crónica y Luis Gordillo, “autores que coles sos creaciones afiguren unos planteamientos nuevos frente al poder de la espresión y el discursu más esistencial de los informalistas precedentes”, indica'l catálogu de mano de la esposición. “Finalmente, gracies al llabor de Miquel Barceló, José Manuel Broto, Miquel Navarro o Francisco Leiro, ente otros, la esposición llega a l'actualidá”, añede.