Na colección d'Hestoria Natural más importante d'España guárdense ayalgues d'Asturies. Delles depositaes va más de dos sieglos no que nació siendo'l gabinete de ciencia de Carlos III y que bien lluegu, por decisión real, pasó a ser ún de los primeros gabinetes qu'abrió al públicu pa fomentar la educación ciudadana. Corría l'añu de 1771.
Convertíu col tiempu nel Muséu Nacional de Ciencies Naturales, con sede en Madrid, ta somorguiáu dafechu na celebración del so 250 aniversariu, al que llegó siendo ún de los institutos d'investigación científica más importantes d'España nel ámbitu de les ciencies naturales.
El centru, que pertenez al Consejo Superior de Investigaciones Científicas (CSIC), presume de llevar tou esi tiempu poniendo la ciencia al algame de la ciudadanía. Casi desque la xeoloxía, la paleontoloxía o la mineraloxía yeren una intuición de curiosos, entusiastes y observadores, les más de les vegaes de clases acomodaes.
Por eso la creación del Real Gabinete d'Hestoria Natural foi un acontecimientu de gran relevancia na vida cultural de la España ilustrada del sieglu XVIII. El so fin nun yera otru que'l fomentu de la hestoria natural n'España y los sos dominios ente toles clases sociales y eso tenía que se facer al traviés de la esposición de toa clase de «producciones naturales», principalmente procedentes de la Península Ibérica, América y Filipines.
L'apertura llevó apareyada la publicación d'una Real Orde pola que toes les autoridaes del imperiu se responsabilizaren del unvíu al Real Gabinete de les «producciones naturales» d'interés y tou tipu de “intereses d'arte” que s'atoparen nos territorios so la so xurisdicción. Esos unvíos asocediéron y Asturies y los asturianos participaron na medría de colecciones que son, agora, quiciabes lo más anecdótico d'un centru de vocación científica.
El muséu recibe unes 300.000 visites al añu y tienen un equipu d'investigación formáu por más de 80 persones dedicaes al estudiu de la biodiversidá y el cambéu climáticu, la ecoloxía, la paleobioloxía, la xeoloxía o la bioloxía microbiana. Pero les sos colecciones -y los documentos que les arriquecen- son puntu y aparte.
Intramuros guárdense más de 10 millones d'exemplares d'eses denominaes “producciones naturales” que suponíen por dalguna razón un afayu reseñable. Y eso inclúi dende tener la colección d'exemplares disecaos de mamíferos más importante y numberosa del territoriu español, a una gran amuesa de plaques de mármoles históricos de Carlos III, una selección de perlles na colección de malacoloxía, o una de piedres benzoares -procedentes d'intestinos o banduyos d'animales- na d'artes decoratives. Simples exemplos de la enorme diversidá que se curia. Los conteníos atópense disponibles pal so usu con fines científicos o culturales, siempres que nun se comprometa'l so caltenimientu pa les xeneraciones futures.
¿Y qué apurrió a Asturies? Enforma y de too.
L'osu de la discordia
Nel muséu enséñase un osu pardu que se valtó en Somiedu va más de 100 años. La pieza tarifáronla dos cazadores, el marqués de Villaviciosa, y el so primu Pepón. Primero alcordaron donala al muséu pero al otru añu Pepón camudó d'opinión y quixo llevar l'osu. El pleitu atayólu'l rei, Alfonso XIII, que regaló l'animal al Muséu con una placa na que nun figuraben nengún de los cazadores. Pedro Pidal siquier espachóse publicando, en 1917, un pequenu llibrucu, “El oso del Museo”, que se caltien nel archivu del MNCN y conclúi con una enseñanza: “El que lo quiere todo para sí y nada para el prójimo, tras perder la grandeza moral y la simpatía de las gentes, se expone a quedarse sin nada, y lo merece. La ambición rompe el saco.”
Amueses de mármoles
Nos almacenes hai guardada un colección de plaques de mármoles o roques ornamentales estrayíes en canteres de tou'l país nel XVIII. Son amueses pa dar fe de la procedencia de la piedra que sirvió pa los retablos y recubrimientos artísticos de palacios y catedrales nel sieglu XVII y XVIII. Asina que son testigos de les principales variedaes de roques ornamentales españoles cuando'l país yera la segunda potencia mundial de producción d'estes piedres. Dalgunes d'eses canteres yá nin esisten. D'Asturies hai cuatro amueses d'alabastros (falses ágates), de Pravia y d'Uviéu.
El meteoritu de Cangas (1866)
El muséu tamién curia una amuesa del escepcional meteoritu que cayó en Cangues d'Onís en 1866. Cayeron un ensame de pieces, según l'estudiu completu que tamién se caltien nel muséu y que rastrexó, 130 años dempués, per ónde andaben los más de 30 fragmentos que s'alcontraron.
Y un misteriu... el de la gran tortuga laúd
Prindáronla unos pescadores na zona de Tazones. Yera una fema de 480 kilos y 2,20 metros de llargu, que tenía dientro más de 5.400 güevos.
Metela nel muséu dio problemes porque nun cabía pela puerta del llaboratoriu de Taxidermia. Les semeyes de la so naturalización ye lo único que queda nel achivu vis que, magar se sabe que yera un exemplar bien destacáu nel Muséu, yá naide sabe ónde anda.
El cascoxu endémicu cantábricu
Un exemplar de Hélix cantábrica Hidalgo, endémicu del Cordal Cantábricu, lleva dende 1876 na colección de malacoloxía -moluscos-.Garróse n'Uviéu, na zona de les Caldes.
