Munchos padres y profesionales de la medicina saben el trabayu que lleva que los más pequenos tomen les melecines, especialmente, nel casu de tratamientos de llarga duración. Un tragu amargosu que, gracies al trabayu d'una nueva investigadora d'Idonial, na “Milla del Conocimientu” de Xixón, va facese llueu muncho más dulce al traviés de la impresión en tres dimensiones.
Helena Herrada, barcelonesa llicenciada en Farmacia, decidió va unos años dar un xiru a la so carrera profesional y púnxose a estudiar un máster en Química y Desenvolvimientu Sostenible que la llevó a facer práctiques nes instalaciones d'Idonial, onde agora ta faciendo'l so doctoráu. Foi'l xerme pa desenvolver un proyectu novedosu n'España y que se resume, a trazos gruesos, na impresión de melecines en tres dimensiones, cola técnica de fabricación aditiva, por que les píldores tengan forma de gominoles. De colores, con golores y muncho más apetecedores pa cualquier neñu.
La fórmula puede afayase a situaciones especiales, como les farmacies hospitalaries
El llogru de formes personalizaes ye ún de los principales atractivos de la impresión 3D pal sector farmacéuticu. Herrada llanzóse de cabeza a un mundu “especializáu, que nun va acabar cola producción en serie de les melecines, pero que tien interés enforma en casos concretos, como les farmacies de los hospitales y les farmacies especializaes en formulaciones”. El procesu ye'l mesmu que se sigue en cualquier impresión en tres dimensiones al usu, namás que nesti casu les “tintes” que s'utilicen compónense de les melecines en cuestión, xunto con un protector gástricu especial: cuando aporten al estómagu tienen el mesmu efectu y les mesmes indicaciones que les pastilles normales. Col aquél de que con namás programar la imprentadora, pueden llograse melecines en forma de corazón, osín, carambelu y asina hasta l'infinitu, no que fai a la imaxinación de caún.
“En casos de neños con tratamientos de muncha duración, por que nun se-yos faiga tan apolmonante pueden facese tandes selmanales, de manera que cada selmana les medicines tengan una forma y un arume distintu. Por casu, una del dibuxu animáu Peppa Pig con golor a piña. Eso ayuda enforma a amenorgar l'impactu psicolóxicu de la enfermedá”, esplica la investigadora. Amás, cola ventaya añedida de que ye bien fácil afayar el tamañu de les píldores, les dosis en función del pesu o de les necesidaes de cada paciente de forma instantánea y personalizada dafechu.
“De lo que se trata ye de facer atractivu un procesu que d'otru xeitu pa los neños nun lo ye tanto”, resume Helena Herrada, qu'acaba de publicar la primer parte de les sos investigaciones na revista “*International Journal of Pharmaceutics”. Una reblagada pa que munchos neños-yos pierdan el mieu a los fármacos. Parafrasiando a Mary Poppins, la píldora agora va saber meyor.
