El periodismu de sucesos camudó d'un xeitu bultable: d'entrar directamente “hasta la cocina” de les comisaríes y convertir al informador nun investigador más, a tratar con un gabinete de prensa muncho más herméticu y rigurosu. Un coloquiu-homenaxe a aquella dómina de “El Caso” na que la pionera Margarita Landi adientró nel inframundu de los crímenes axuntó esti día n'Uviéu (nuna pañería de la cai Padre Buenaventura de Paredes) a cuatro periodistes de sucesos, de distintos medios y xeneraciones, pa falar sobre esti xéneru. 

La redactora de LA NUEVA ESPAÑA Marián Martínez y les sos compañeres Patricia Peiró (“El País”), Olaya Suárez (“El Comercio”) y Cruz Morcillo (“ABC”) axuntaron pa compartir opiniones y trayectories. “Ye una tipoloxía mui sopelexada y que se tacha de morbosa. Pero tien un gran componente social, avérate a la xente”, declararon. Patricia y Olaya teníen claro que queríen dedicase a esi mundu, Marián y Cruz entraron por casualidá, pero toes reconocen que tien daqué qu'enguedeya. Tal como esplica Mariam Martínez, cuando pasa un sucesu, la información hai que salir a buscala y si l'atopes nuna muyer en bata, meyor: “Peluqueríes, chigres y vecinos son la clave. Ehí siempre hai daquién que lo tien visto too”. 

Esa ye la parte que les llevó a siguir na materia: el tratu personal, el contactu coles fontes, llegar a un llugar ensin saber qué pueden atopar y salir con mediu casu resueltu. Amás, como afirmaba la mesma Landi, “cualesquier puede convertise n'asesín”, y eso fai de dellos delitos un cadexu de filos qu'obsesiona desenguedeyar. Porque, tal que defende Peiró, ye común atopase a un narcotraficante muertu, pero hai otros crímenes nos que'l móvil resulta inesplicable y esto aumenta'l retu. Con too, según afirmen, ye too deformación profesional: el primer muertu nun s'escaez, el segundu impacta, col terceru yá empieza a ser daqué rutinario. Anque non menos relevante. 

Si hai daqué que nun puede sacar nenguna de la so cabeza son los neños. Cuando hai víctimes infantiles pel mediu, la información siempre dexa un llancetazu de dolor espetáu. “Enxamás voi escaecer el casu d'un naciellu al que so madre apuñaló y tiró nun contenedor. Amás, naquel momentu taba embarazada de tres meses”, cuenta Suárez. Pa Morcillo, el so escayu ye Asunta Basterra, y pa Martínez, el crime de la Peñona, nel que cuatro neños fueron tiraos al mar pola so proxenitora. 

¿Llínees coloraes a la d'escribir d'una tema? Toes lo tienen perclaro: “la familia”. Empatizar coles persones averaes a los implicaos y pensar en cómo-yos gustaría lleer esa información si se tratara d'un ser queríu. Elles lo dicen, nun fai falta cayer nel amarillismu pa conta-y a la población qué pasó; otra vuelta como lo fadría Landi. Morcillo añede otra barrera infranquiable, la investigación. Cuando un periodista fai peligrar un casu pol enfotu de sacar la noticia enantes de tiempu ta ayudando a escapar al sospechosu. 

Nun tán segures de si'l pasu del tiempu y la meyora de les tecnoloxíes resultaron útiles. Ye una arma de doble filu. Per una parte, perdióse la relación de tu a tu colos Cuerpos de Seguridá, agora depende too d'un gabinete de prensa, que puede querer apurrir información o non. Peiró, que ye la más moza, entró na redacción yá con esti sistema, y echa de menos el trabayu n'equipu: “Dacuando un policía quier contate coses, pero nun lu dexen”. Y coles redes sociales, el desenvolvimientu d'internet y la tarrecida “deep web” too se complica: “N'ocasiones aporten más tracamundiu qu'ayuda”. 

Asina, charraron daqué más d'una hora sobre sucesos, anécdotes (delles gracioses y otres respigantes) y dalguna qu'otra demanda. Porque a la fin, son el periodismu espuestu, el de cai, llibreta y muncha tensión. Pero tamién el que “se separa de los despachos y les ruedes de prensa y t'avera a la realidá”.